978 Бардыгы /

БАТКЕН. Баткен облусунун чек арага жакын айылдарындагы мектептер кайра дан өз ишин жандантышты.

Президенттин Баткен облустук Өкүлчүлүгүнөн маалымдашкандай, Баткен районунун Ак-Сай Айыл Өкмөтүнө караштуу Көк-Таш айылындагы 2022-жылдын 27-январындагы Тажик тараптын куралдуу кол салуусунан улам чек арага жакын жайгашкан кыштактардагы агартуу мекемелеринде окуу жараяны убактылуу токтотулган эле. Белгилүү болгондой, ушул тапта  Баткен районунун Ак-Татыр, Самаркандек, Көк-Таш, Ак-Сай, Орто-Боз, Паскы-Арык, Таш-Тумшук айылдарында жайгашкан билим берүү мекемелери – орто мектептер өз ишмердүүлүгүн кадимкидей уланта башташты. Мектеп окуучуларынын коопсуздугун балдар менен иштөө инспекциясынын кызматкерлери туруктуу көзөмөлгө алышып, жеринде күчөтүлгөн тартипте гана иш алып барып жатышат.

Мындан тышкары аталган аймактарда коомдук тартипти көзөмөлдөө, ошондой эле ар кандай чагымчыл аракеттерге жол бербөө максатында ички иштер органдарынын кызматкерлери жергиликтүү калк арасында түшүндүрүү жараянын дагы ого бетер күчөтүштү.

Алишер ТОКСОНБАЕВ, өз кабарчы