1,851 Бардыгы /

        ОШ. Кыргызстандын Түштүк башкалаасындагы интернационалист-жоокерлерге арналган мемориалдык комплексте Ооганстандан Советтик аскерлердин чыгарылгандыгынын 33 жылдыгына арналган иш-чара өткөрүлдү.

          Бул аземге Ош шаарынын вице-мэри Венера Рыскулова, президенттин Ош облусундагы ыйгарым укуктуу Өкүлү Зиядин Жамалдинов, Ош шаардык Кеңешинин депутаты Мэлис Жусупов, Орусиянын Оштогу башкы консулу Андрей Бибишев, Ош гарнизонунун башчысы Руслан Муканбетов, Кыргыз Республикасынын Улуттук гвардиясынын аскер кызматкерлери, интернационалисттер, ардагерлер жана кан майданда курман болгондордун тууган-уруктары катышышты. Иш-чаранын жүрүшүндө ооганчылардын мемориалдык комплексиндеги өчпөс отко гүлчамбарлар коюлуп, андан соң асманга карай ок – салют атылды. Ошондой эле курман болгон интернационалист-жоокерлердин элесине багышталып куран дагы окулду.

          Ош шаарынын вице-мэри Венера Рыскулова бул иш-чараны өткөрүүнүн азыр деле абдан маанилүүлүгүн баса белгилеп, өтө катаал жылдарда аскер кызматкерлеринин тынчтык үчүн жана келечек муундардын бактысы үчүн жасаган эрдиктерин эстен чыгарбоо керектигин баса белгиледи.

          Баса, Ооганстандагы аскердик операциялар 1979-жылдан 1989-жылга чейин – дээрлик он жылга созулган. Советтик аскерлердин Оорганстандан чыгарылгандыгына быйыл 33 жыл толду. Бүгүнкү күндө Ош шаарында 363 интернационалист-жоокер жашап жаткан чагы.

Алишер ТОКСОНБАЕВ, өз кабарчы