1,065 Бардыгы /

ЖАЛАЛ-АБАД. Базар-Коргон район аймагында үй-бүлөлүк зордук-зомбулуктардын алдын алуу максатында биргелешип иштөө зарылдыгы максатында райондук администрациясынын, РИИБдин, билим берүү бөлүмүнүн кызматкерлеринин, мектеп директорлорунун, социалдык педагогдор жана ата-энелер комитеттеринин төрагаларынын катышуусунда кеңешме өткөрүлдү.

Жалал-Абад ОИИБдин басма сөз кызматы маалымдагандай, бул кеңешмеден соң кызматкерлер милициянын көчмө кабылдама унаасында эл менен жолугушууга чыгышты. Анда Базар-Коргон шаарынын жана Арстанбап, Талдуу-Булак, Сейдикум айыл аймактарынын тургундары менен жолугушуулар өткөрүлдү. Жолугушууда үй-бүлөлүк чыр-чатактарды болтурбоо, суицид, эрте никеге туруу жана жаш өспүрүмдөр арасында кылмыштуулуктун алдын алуу боюнча түшүндүрүү иштери жүргүзүлдү.

Өлкө башчы Садыр Жапаров тарабынан ысырапкерчиликтин алдын алуу боюнча чыгарылган жарлыгынын алкагында кенен талкуулар орун алды. Жергиликтүү тургундарга кылмыштуулукка бөгөт коюуда кайдыгер карабай, терс көрүнүштөргө күбө болгон учурда милицияга билдирүү зарылдыгы айтылды.

2022-жылдын 3 ай аралыгында Базар-Коргон районунда 17 үй-бүлөлүк зордук-зомбулук фактысы катталып, 17 коргоо ордери берилген. Берилген коргоо ордерлери боюнча РИИБдин участкалык инспекторлору тарабынан көзөмөл карточкалары ачылып, 3 күндүк мөөнөткө каттого алынып, тиешелүү профилактикалык иштер жүргүзүлгөн. Профилактикалык иш-чараларды жүргүзүүдө коргоо ордерлерин узартуу учурлары катталган эмес.