780 Бардыгы /

ЖАЛАЛ-АБАД. Камактагы журналист Куттумидин Базаркулов анын үстүнөн козголгон кылмыш ишин сөз эркиндигин чектөө сыңары баалады. Бул жөнүндө ал кесиптештиринин соболдоруна жооп кайтарып жатып жар салды.

Ушул жылдын 12-апрелинде Жалал-Абад шаардык сотунда журналисттин соту болбой калды. Анткени Куттумидин Базаркуловдун жактоочулары аны үй камагына чыгаруу өтүнүчүн шаардык сот канааттандырган эмес. Алар облустук сотко апелляциялык даттануу менен кайрылгандыктан, 12-апрелдеги шаардык соттун отуруму дагы жылдырылды.

• Менин кармалганым – сөз эркиндигине болгон ачык кысым!

Кыргызстанда эркиндикти кишендешти. Ал эми Жалал-Абад облустук телеканалдагы айтылып жаткан 5 миллион 714 миң сомдук техникалар келген. Анын баары эсепчиден өткөн. Мунун баары жалган жалаа! Соттук отурумдун баары менсиз эле өттү. Кээ бир учурларда жактоочум дагы жок болуп жатты. Бүгүн дагы соттук жараян жылып кетти. Кыргызстанда сөз эркиндигин камсыздабаса, бүгүнкү бийликке аброй алып келбейт! – деп чырылдады Куттумидин Базаркулов.

Баса, ушул жылдын 24-мартында дагы Куттумидин Базаркуловдун кан басымы көтөрүлгөндүктөн, убактылуу кармоочу жайга “Тез жардам” чакыртылган. Жалал-Абад облустук телерадио компаниясынын (ЖТРдын) мурдагы жетекчиси Куттумидин Базаркуловду Улуттук коопсуздук комитети (УКМК) 2021-жылдын 27-ноябрында үйүнөн кармаган. Базаркулов “Кызматынан кыянаттык менен пайдалануу” беренеси менен айыпталууда.

Куттумидин Базаркулов Жалал-Абад облустук телерадио компаниясын 2010-2016-жылдары жетектеген. 2021-жылы 10-январда өткөн Президенттик шайлоого талапкерлигин коюп, кайра андан баш баш тарткан. Ал акыркы жылдары коомдук-саясий иштерге абдан активдүү аралашып, 2020-жылы Октябрь окуясынан кийин бийликке келгендерди кескин сындап жүргөн.

Алишер ТОКСОНБАЕВ, өз кабарчы