2,220 Бардыгы /

ЖАЛАЛ-АБАД. Жалал-Абад шаарындагы №13 Розы Азимов атындагы орто мектебинин чоң залында Муса Жангазиев атындагы Кыргыз мамлекеттик куурчак театры БУУнун Балдар фондунун (ЮНИСЕФ) колдоосу менен Жалал-Абад облустук үй-бүлөлүк медицина борборунун район- шаарлардагы Ден соолукту чыңдоо кабинетинин адистеринин жардамы “Шайыр вакцина” пьесасы тартууланды.

Жалал-Абад облустук үй-бүлөлүк медицина борборунун Ден соолукту чыңдоо кабинетинин маалыматына ылайык, “Шайыр вакцина”спектаклине жаш балдар, окуучулар, ата-энелер жана чоң ата, чоң энелер катышууда.

“Керемет көч” мультфильминин негизинде коюлган “Шайыр вакцина” спектакли Акылай жана анын достору тууралуу баяндайт. Алар айланабыздагы бардык терс каармандар: көзгө көрүнбөгөн бактериялар, инфекциялар, вирустар, кызамыктар жана башкалар менен күрөшөт.

Спектакль эмдөөнүн маанилүүлүгү тууралуу айтып берип, балдарда ийнеден корккон сезимди жок кылып, ден соолукту чыңдоо үчүн бул процедуранын маанилүүлүгүн түшүндүрүп беришти. 

Жалал-Абад облустук үй-бүлөлүк медицина борборунун район-шаарларындагы Ден соолукту чыңдоо кабинетинин адистери тарабынан эмдөөнүн натыйжалуулугу тууралуу маалыматтар айтылып, атайын баракчалар таратылууда

Аталган куурчак театры облустун район-шаарларында коюлууда. Алдыда Кара-Көл жана Токтогул шаарларында жүздөгөн балдарга спектакль тартууламакчы.