1,302 Бардыгы /

ЖАЛАЛ-АБАД. Кечээ, 26-октябрда ЭАУда кыргыз спортунун легендасы, оор атлетика боюнча дүйнөнүн төрт, Европанын эки жолку чемпиону, 1980-жылдагы олимпиада оюндарынын жеңүүчүсү Каныбек Осмоналиев менен жолугушуу болуп өттү.

ЭАУнун кесиптик багыт берүү жана коомчулук менен байланыштар кызматы маалымдагандай, кыргыз спортунун легендасы, оор атлетика боюнча дүйнөнүн төрт, Европанын эки жолку чемпиону, 1980-жылы Москва шаарындагы олимпиада оюндарынын жеңүүчүсү Каныбек Осмоналиев К.Ш. Токтомаматов атындагы Эл аралык университетке (ЭАУ, Жалал-Абад ш.) мейманга келип, профессор-окутуучулар курамы жана студенттери менен жолугушту. ЭАУнун студенттери үчүн кыргыз спортунун легендасы менен жолугушуу абдан кызыктуу болду. Жолугушууну спорт журналисти, Кыргыз Республикасынын маданиятынын эмгек сиңирген ишмери, Спорт журналистеринин федерациясынын башкы катчысы Кабыд Макешов алып барды. Жолугушууда Каныбек Осмоналиев өзүнүн спорт жаатындагы ишмердиги боюнча баяндама берип, бир катар суроолорго жооп берди. Сөзүнүн соңунда жаштарды сергек жашоо ыңгайына, спорт менен машыгууга, мекенчилдиккке үндөп, Ата Мекенге чын дилинен кызмат кылууга чакырды. ЭАУ ректораты Каныбек Осмоналиевге жамаат жана жаштар менен жолугушкандыгы үчүн терең ыраазычылык билдирди. Муну менен бирге, ушул жолугушууну уюштуруу демилгеси үчүн Жалал-Абад областтык спорт башкармалыгынын башчысы Абдыжапар Капаровго да ыраазычылыктар айтылды.Өз кезегинде Каныбек Осмоналиев, Кабыл Макешов жана Абдыжапар Капаров да ЭАУ ректоратына жылуу тосуп алгандыгы үчүн рахмат айтышты. Жолугушуудан кийин Каныбек Осмоналиев ЭАУнун спорттук комплекси менен таанышып, аны өнүктүрүү боюнча бир катар сунуштарын берди. ЭАУ ректораты университеттин дене тарбия жана спорт кафедрасынын башчысы доц. У.Б. Амиракуловго жана “Ден соолук” спорт клубунун төрагасы М.А. Таштановго да аталган жолугушууну сапаттуу уюштургандыгы үчүн өзгөчө ыраазычылык билдирет.