1,608 Бардыгы /

ЖАЛАЛ-АБАД. Бүгүн, 3-ноябрда К.Ш. Токтомаматов атындагы Эл аралык университетте (ЭАУ, Жалал-Абад ш.) жаңы чатырлуу комплекстин салтанаттуу ачылышы болуп өттү.

ЭАУнун кесиптик багыт берүү жана коомчулук менен байланыштар борбору билдиргендей,

бул салтанаттуу ачылышка Кыргыз Республикасынын Президентинин Жалал-Абад областындагы ыйгарым укуктуу өкүлү А.Т. Сыргабаев, Жалал-Абад шаарынын мэри Э.А. Ормоков, о.э. бир катар билим берүү жана спорт уюм-мекемелеринин жетекчилери катышты. Салтанат университеттин спорттук командаларынын парады менен башталды. Окуу жайдын жетекчилиги жана чакырылган меймандар куттуктоо сөздөрүн каалоо- тилектерин айтышкан соң, андан кийин чакан концерттик программа тартууланды.

Расмий бөлүктөн кийин университеттин мини футбол жана волейбол командаларынын көрсөтмө мелдештери өткөрүлдү. Жаңы спорттук комплексте жасалма төшөлмөлүү мини футбол жана волейбол аянттары, көрүүчүлөр үчүн ыңгайлуу орундуктар, кийим алмаштыруучу жана чайкануучу бөлмөлөр бар. Эми бул жерде спорт менен машыгуу, тийиштүү спорттук мелдештерди өткөрүү үчүн жетиштүү шарттар түзүлгөн. Бул комплексти окуу жайдын дене тарбия жана спорт кафедрасы жана “Ден соолук” спорт клубу пайдаланмакчы.

Белгилей кетсек, спорт комплексинин курулушу 2019-жылы башталып, эми пайдаланууга берилүүдө, жалпы аянты 1125 чарчы метр. Ушул спорт комплекстин ачылышы менен Жалал-Абад шаарынын спорттук инфраструктурасында жаштардын ден соолугун чыңдоо, бош убактысын пайдалуу өткөрүү үчүн дагы бир жакшы түзүлдү.