1,275 Бардыгы /

ЖАЛАЛ-АБАД.Кечээ, 3-ноябрда Бекмамат Осмонов атындагы Жалала-Абад мамлекеттик университетинин Жалал-Абад колледжинде Азия Өнүктүрүү Банкы тарабынан каржыланган “Инклюзивдүү өнүгүү үчүн көндүмдөр, секторду өнүктүрүү” долбоорунун алкагында “Алдыңкы тажрыйба борбору” ачылды.

Жалал-Абад шаардык мэриясынын маалымат борбору маалымдагандай,

борбордун ачылуу аземинде онлайн байланыш аркылуу Министрлер Кабинетинин Төрагасынын орун басары Эдил Байсалов жана Азия Өнүктүрүү Банкынын Кыргызстандагы туруктуу өкүлчүлүгүнүн башчысы Канокпан Лао-Арая сөз сүйлөп, куттуктоо сөзүн жолдошту. Ал эми иш-чарага жеринде Кыргыз Республикасынын Президентинин Жалал-Абад облусундагы ыйгарым укуктуу өкүлүнүн аппаратынын социалдык өнүгүү бөлүмүнүн башчысы Гүлзат Аширова, шаар мэри Эрнисбек Ормоков, шаардык кеңештин төрагасы Нуртилек Орозбаев, Жалал-Абад колледжинин директору Бариса Турдубаева баштаган мугалимдер жана студенттер катышты.

Шаар мэри Эрнисбек Ормоков мугалимдерди жана студенттерди “Алдыңкы тажрыйба борборунун” ачылышы менен куттуктап, өлкө келечеги болгон жаштардын билим алуусуна жаратылган заманбап шарттар үчүн окуу жайдын жетекчилигине жана каржылык колдоо көрсөткөн Азия Өнүктүрүү Банкына ыраазычлык билдирди.

Аталган борбордо кийимдерди тигүүчү аппараттар, бир нече компьтердик класстар, интерактивдүү доскалар менен жабдылган бөлмөлөр, заманбап окуу куруладары жана жабдыктар бар.

Жалал-Абад колледжинде 3000ге чукул студент 19 адистик боюнча билим алат.

Белгилей кетсек, Азия Өнүктүрүү Банкынын каржылык колдоосу менен өлкөдөгү 8 колледжде “Алдыңкы тажрыйба борбору” ачылды.