811 Бардыгы /

ЖАЛАЛ-АБАД. Кечээ, 14-ноябрда Иордания мамлекетинин борбору Амман шаарында өткөн бокс боюнча Азия биринчилигинде 71 килограмм салмакта коло медаль уткан Нурадин Рустамбек уулун Жалал-Абад аэропортунан тосуп алуу аземи өттү.

Жалал-Абад шаардык мэриясынын маалымат борбору маалымдагандай,

спортчуну тосуп алууга Кыргыз Республикасынын Президентинин Жалал-Абад облусундагы ыйгарым укуктуу өкүлүнүн орун басары Мамасалы Такабаев, Жалал-Абад шаарынын мэри Эрнисбек Ормоков, спортчунун машыктыруучулары жана жакындары катышты. Шаар мэри спортчунун ийгилиги менен куттуктап, Жалал-Абад шаарында тарбияланган жаш спортчулардын өлкөдө өткөн жана Дүйнөлүк, Азиялык мелдештерде ийгилик жаратып жатканы сыймык экенин баса белгилеп, жергиликтүү бийлик спортчуларды ар дайым колдоп келээрин билдирди.

Нурадин буга чейин 2019-жылы Монголиянын борбор шаары Улан-Батордо өткөн бокс боюнча жаштар арасындагы дүйнөлүк чемпионатта 69 кг салмакта 1- орунду, 2020-жылы Азербайжандын борбор шаары Бакуда кичи дүйнөлүк чемпионатта 69 кг салмакта 1-орунду багындырган. 2021-жылы бокс боюнча 71 кг салмакта Кыргыз Республикасынын чемпионатында 1-орунду ээлеген болсо, быйылкы жылы Ташкентте өткөн Азия чемпионатында күмүш медаль уткан.

Эске салсак, 30-сентябрдан 13-ноябрга чейин Иорданиянын Амман шаарында өткөн Азия чемпионатында Кыргызстандан барган 4 спортчу 4 коло медалды багындырган.