33 Бардыгы /

Аксы районунун Кербен шаарына караштуу Жерге-Тал айылынын тургуну Аскат Токтоматов 20 жашка чейинки жаштар арасында эркин күрөш боюнча Азия чемпиону болду. Бул тууралуу Аксы райондук мамлекеттик администрациясынан маалымдалды.

Маалыматка ылайык, абройлуу турнир 13-июлда Бишкекте жыйынтыкталып, континенттин эң күчтүү спортчулары топтолду. Аскат Токтоматов 61 килограммга чейинки салмак ченинде күч сынашты. Спортчу өз оюнун чейрек финалдан баштап, атаандаштарын эки жолу ишенимдүү жеңип алды. Чечүүчү кармашта Аскат Япониянын өкүлү менен беттешти. Мыкты тактикасы жана күчү менен ал 8-2 эсебинде жеңип, алтын медалдын ээси жана Азиянын татыктуу чемпиону болду.

“Аскат Токтоматовду жаркын жеңиши менен куттуктайбыз! Бул жетишкендик Кыргызстандын жаш спортчуларын жаңы жетишкендиктерге жана жаркын жеңиштерге шыктандырат!”-дейт маалыматта.

Белгилей кетсек, Аскат Токтоматов Кыргызстандын 3 жолку чемпиону жана Азия чемпионатынын күмүш жана алтын медалынын ээси.