2,532 Бардыгы /

Урматтуу Жалал-Абад облусунун тургундары жана коноктору!

Сиздерди Кыргыз Республикасынын Президентинин Жалал-Абад облусундагы ыйгарым укуктуу өкүлүнүн жалпы аппаратынын жана жеке өзүмдүн атымдан 31-август- Кыргыз Республикасынын Эгемендүүлүгүнүн  30 жылдыгы менен чын дилимден куттуктайм! Бул мамлекетибиз үчүн улуу күн. Көз карандысыздыгыбыз–эң ыйык дөөлөтүбүз, эң бийик сыймыгыбыз. Эгемендигибиз–ыйык мурасыбыз. Эркиндигибиз–ар бирибиздин жүрөгүбүздүн тереңинде жашай турган сезимибиз. Улуулардан алып, урпактарга өткөрүп берчү аманатыбыз.

Өлкөбүз эгемендүүлүк алып мамлекет катары калыптануудагы 30 жыл аралыгында бир топ татаал күндөрдү баштан өткөрдү. Кыйын күндөрдө акылман  кыргыз элибиз биримдигин чыңдап, өнүгүүгө карай бет алып келет. Жыл өткөн сайын Кыргызстан бардык тармактарда дүйнө элдери менен тең тайлаша өнүгүү жолунда десек болот. Алсак, билим берүү, маданият жана спорт тармагы.

Эгемендүүлүктүн 30 жылдыгынын алкагында тургундарыбызга майрамдык көтөрүңкү маанай тартуулоо максатында бир топ маданий жана спорттук иш-чаралар уюштурулуп келүүдө. Ушул жылдын 20-август күнү республикалык ири масштабдагы “Алтын өрөөн” кол өнөрчүлөрдүн жана дизайнерлердин фестивалы, аны менен бирге 28-август күнү Ноокен районунда “Ноокен–мистенин мекени” аталышындагы эл аралык фестивал өттү. Бул облусубузда өндүрүлгөн мистени кайра иштетүү менен экспортко алып чыгууга чоң шарт түзүү максатын көздөйт. Фестивалдын алкагында дыйкандарыбыз бир нече келишимдерди түзүүгө жетишишти. Ошондой эле жаштарды спортту сүйүүгө жана сергек жашоого үндөөдө 28-август күнү Базар-Коргон районунун Арстанбап айылында алыш күрөшү боюнча өкүлдүн кубогу өткөрүлдү.

Жалал-Абад облусунун аймактарын өнүктүрүү, калктын социалдык муктаждыктарын камсыздоо, инфратүзүмдү жакшыртуу максатында бир катар иш аракеттер көрүлүүдө. Айта кетсек, жыл башынан бери 6 балдар бакчасы ачылып, дагы төрт имараттын курулушу аяктоо алдында турат. Билим берүү, саламаттыкты сактоо жаатында да ири курулуштар жүзөгө ашты. Азыркы учурдагы биздин эң башкы багыт өндүрүштү жандантып, калкты жумуш менен камсыздоо. Ушул жылдын алты айында облус аймагында 500дөн ашуун жаңы жумуш орундары түзүлдү. Облустун ар тараптуу өнүгүүсүндөгү аракеттерибиз мындан ары да күчөтүлөт.

Сиздерди Кыргыз Республикасынын Эгемендүүлүгүнүн 30 жылдыгы менен дагы бир жолу чын жүрөктөн куттуктайм! Көз карандысыздыгыбыз түбөлүккө уланып, элибиздин ден соолугу бекем, бардарчылыкта өмүр сүрсүн! Асманыбыз ачык, түндүгүбүз бийик болсун!

Абсаттар СЫРГАБАЕВ,

Кыргыз Республикасынын Президентинин Жалал-Абад облусундагы ыйгарым укуктуу өкүлү