981 Бардыгы /

ЖАЛАЛ-АБАД.  Бүгүн, 25-октябрда К.Ш. Токтомаматов атындагы Эл аралык университетте (ЭАУ, Жалал-Абад ш.) салтанаттуу түрдө күзгү студенттик спартакиаданын ачылышы болду. Бул тууралуу ЭАУнун Кесиптик багыт берүү жана коомчулук менен байланыштар кызматы маалымдады.

Бул спартакиада 25-29-октябрь күндөрү өткөрүлөт. Спартакиаданын максаты: спорт аркылуу студент жаштар арасында сергек жашоо ыңгайын жайылтуу, республикалык деңгээлде спартакиадаларга жана универсиадаларга окуу жайдын командаларын даярдоо. Спатакиада спорттун төмөнкү түрлөрү боюнча өткөрүлөт, алар: волейбол, баскетбол, стритбол, мини футбол, стол тенниси, чатыраш, тогуз коргоол, жеңил атлетика, аркан тартышуу. Спартакиаданын ачылышына арналган салтанаттуу чогулушта ЭАУнун ректору, э.и.д., профессор, РМА академиги Сатыбалды Өмүрзаков спортсмен студенттерибизге албан-албан спорттук ийгиликтерди жана аларга жетишүүдө командалык ынтымактагы оюндарды каалап кетти. Мындай спраткиадалардын өткөрүлүшү бул окуу жайдын жакшы салттарынан болуп калган, ал салттарды 1993-жылдан бери университеттин туңгуч ректору, э.и.д., профессор, РМА академиги Кантөрө Токтомаматов негиздеп кеткен. Спартакиаданын жеңүүчүлөрүнө жакшы сыйлыктар берилди.

Белгилей кетсек, 20-октябрда Ош шаарында “XXI кылым кадрлары” аттуу жогорку окуу жайлар арасында өткөрүлгөн студенттик демилгелер форумунун алкагындагы волейбол мелдешинде кыздар курама командасы 3-орунду ээлеген.