1,041 total views

Бүгүн, 24-июнда Москвада Жеңиш парады өтүп жатат.

Экинчи дүйнөлүк согушта нацистик Германиянын жеңилишине арналган аскер парады жыл сайын салттуу түрдө 9-майда өткөрүлүп келген. Быйыл Путин коронавирус пандемиясына байланыштуу анын датасын жылдырууга аргасыз болгон.

Бул иш-чара 1-июлга белгиленген референдумдун алдында өтүүдө. Конституцияга киргизилген толуктоолор колдоо тапса, Путиндин 2036-жылга чейин бийликте калышына жол ачылат.

Москванын мэри Сергей Собянин буга чейин шаар тургундарын үйлөрүндө болуп, парадды теле аркылуу көрүүнү сунуштаган.

Орусиядагы бир нече шаар жетекчилери да парад өткөрүүгө камынып, бирок кийинчерээк бул чечимдеринен баш тартып же аны көрүүчүлөрсүз уюштурууну чечишкенин жарыялашкан.

Быйыл парадга Франция, Чехия, Хорватия жана Кытай президенттери катышууну пландаган. Пандемияга байланыштуу парад 9-майдан 24-июнга жылдырылгандан кийин алар сапардан баш тартышты. Ушул тапта ага Беларус, Казакстан, Молдова, Сербия, Тажикстан жана Өзбекстан президенттери катышууда. Москвага Эл аралык коомчулук тааныбаган Абхазия жана Түштүк Осетиянын жетекчилери жана Босния менен Герцеговинанын жамааттык президиумунун мүчөсү Милорад Додик да келди.

Кыргызстан президенти Сооронбай Жээнбеков аны Москвага коштоп барган делегация мүчөлөрүнөн вирус аныкталгандан кийин парадга катышкан жок.

www.