10,927 Бардыгы /

«Балабыз айткан сөздү укпайт. Эмне кыларыбызды билбей калдык»-деп наалыгандар четтен чыгат.
Ырасында эле балага тарбия берүүдөн оор жумуш жок, бала кургак акыл айтканды жактырбайт…
Керели-кеч акыл айта берген деле баланы күнөөсүз урганга тете. Балдарды уруп да тарбиялабайт!
Кээ бирөөлөр баланын жашоосуна кийлигишип, обу жок эле тыя берет, кээлер ашкере эркелетет…
Бир үйдө он бала болсо, онунун он башка кыял-жоругу бар, бири атага, бири энеге жакын, анда:
атасы уулун, эне кызын тарбиялаш керекпи, баланы эмнеге үйрөткөндө турмуштан кыйналбайт?
Бардар үйдүн баласы менен жетишпеген үйдө өскөн баланын кимиси жакшы чыгат деп ойлойсуз?
Бул жеӊил-желпи суроо эмес, атактуулардын уул-кыздарын, жетим өскөндөрдү да көрүп жүрөбүз.
Бардар үй-бүлөдө чоӊойгондор баары жетиштүү болсо да, ата-эне мээрими жетпегенин айтышат.
Каалайбызбы, жокпу: «Балага кандай тарбия бериш керек?» -деген суроо күн тартибинде турат.
Айласы алты кеткен үйдө: аял күйөөсүнө, күйөө аялына: «Сени тарткан» деп күнөөнү түртө салат.
А тарбия жөнөкөй нерселерден башталат: эки киши жолукса, кичүүсү озунуп салам айтышы парз,
Улуу киши кол сунуп учурашмайын, кичүүсү кол сунбайт, улуу кишинин сөзүн бузган, талашкан уят.
Бала атасына акыл айтпайт, кыз энесине өйдө карабайт, төр талашкан баладан жакшылык күтпө,
Кыз ата-энесинин үйүндө төрдө отурат, келин болуп барган үйдө оту менен кирип, очогун карайт.
Балага ата-эненин акылы, ур-токмогу тарбия бербейт, балага ата-эненин баскан-турганы тарбия!
Карышкыр бөлтүрүктөрүнө баш тоголотуп үйрөтөт, бүркүт барчындарына кийикти илип көрсөтөт!

Болотбек Таштаналиев
***