3,443 Бардыгы /

Шарапат Ражапова балалык кезинен эле медицина кызматкери болууну эңсечү. Мына ушул кыялдары орто мектепти бүткөнгө чейин аны менен кошо жашады. 1984-жылы орто мектепти аяктап, Майлуу-Суу шаарындагы медициналык окуу жайына окууга кирди.

Балалыгынан бери эңсеп келген кыялы 1986-жылы толук орундалып, медициналык мээрбан кесибинин дипломуна ээ болду. Ошол эле жылы Базар-Коргон районунун борбордук поликлиникасына өз кесиби боюнча ишке орношту.

Поликлиникага ишке киргенден баштап, билбегенин өзүнөн чоң кесиптештеринен сурап, окуу жайдан үйрөнүп келген билимин акылдуулук менен ишке салып, тез эле кесиптештеринин купулуна толо баштады. Бул жерде беш жыл үзгүлтүксүз иштеп, кыйла тажрыйба топтоду. Өзүнүн чыйрактыгы, бейтаптарга жасаган сылык мамилеси менен көпчүлүктүн алкышын алууга да арзыды. Ошол кезде Базар-Коргон районуна караштуу райондор аралык кургак учукка каршы диспанцеринин лабораториясы лаборант адисине муктаж болуп калгандыктан 1991-жылы Шарапат ушул мекемеге лаборанттыкка которулду.

Мына, чейрек кылымдан ашуун убактан бери аталган лабораторияда эмгектенип, эмгек жамаатынын урмат-сыйына татыктуу болууда. Бир кездерде өзү устаттарынан үйрөнгөн тажрыйбасын кийинчерээк жаш адистерге үйрөтүп, азыркы убакта өзү да башкаларга устат болуп калды.Ушул жерде дагы бир нерсени айтып өтүш керек, Шарапат Ражапова жаш мээрбандарга эле эмес, өзү менен бирге иштеген санитаркаларга да кеп-кеңеш берип, көп нерсени үйрөтүп келет.

Камалдин КАМЧЫБЕКОВ, Сузак району, Барпы айылы