1,777 Бардыгы /

Өзбекстандык бир кыргыз акынга Кыргызстандын он акыны тең келалбайт. Анткени өзбекстандык төкмө акын Идирис Айтибаев чындап айтышса Жеңишти да, Алы Туткучовду да жеңип коёт. Өзбекстандык акын Идирис Айтибаев Жеңишке, Алыга окшогон акындарды сыйлап-аяп жүргөндүгүн билишер бекен?! Азыр Ошто эле эмес, Кыргыз Республикасындагы маданий иш-чаралар өзбекстандык төкмө акын Идирис Айтибаевсиз өтпөй калды. Идирис Айтибаев Ошко келип кыргызстандыктарга төкмө акындык кандай болорун практика жүзүндө көрсөтүп, сабак катары далилдеп койду, азамат! Сөзгө чечендиги жагынан, төкмөлүк таланты жагынан кыргызстандыктарды ашкере чөгөлөтүп койгон өзбекстандык Идирис досубуз менен биз сыймыктанабыз!
Ордолуу Ош шаарынын борборунда да, улуттук драма театрында да, филармониясында дайыма өзбекстандык таланттуу алып баруучу Шералы Эгембердиевдин коңгуроодой үнү жаңырып турат. Бул биздин Шералы агабыз. Алып баруучулук таланты жагынан Ошто Шералы агабызга теңтайлаша турган талант али чыга элек. Чындыгына келгенде Ош шаарында ар кандай маданий иш-чараларды Шералы агасыз эч ким талаптагыдай өткөрө албайт. Ошондуктан кыргызстандык кыргыздардын улуттук ар-намысын өзбекстандык кыргыз таланттар коргоп берүүдө деп ачык айта алабыз. Көрсө, таза нукура таланттар Өзбекстандан чыгат турбайбы. Ош шаардык мэриясы, Ош областтык мамлекеттик администрациясы да, улуттук театрдан тартып филармониясына чейин өзбекстандык таланттардын көзүн карап тургандыгы бизди толкундантырат. Өзбекстандан келип кыргызстандык улутташтарды таң калтырып, улутташтардын кадырын көтөрүп жаткан жердештерибиз менен сыймыктанабыз.

Алибек Токуров,
Келдибек Нуров
Токтосун Жеңишбаев
Турдубек Саматов, анжияндык кыргыздар