5,674 Бардыгы /

Эртең менен уйкудан турарыбыз менен эле терезелерди ачып айланага көз чаптырабыз. Көчөлөр көрктүү, таза, таштандысыз, көргөндө көздүн жоосун ала турган болуусун каалайбыз, бирок бул каалообуз ишке ашуусуна өзүбүз аракет кылбайбыз чыгаар.
Шаарда канчалаган көчө, кичи район, район жана шаарчалар бар. Ар бир көчөгө бирден таштанды таштасак, анда шаардан миңдеген таштанды табууга болот. Мындай болсо шаарыбыз жаштардын шаары аталбай, таштандынын мекенине айланып кетүүсү талашсыз. Жада калса өзүбүздөн калган таштандыны да урнага алып барып салбастан жол жээгине, дарактардын түбүнө, арыктын ичине ыргытабыз. Мындай ишти көбүнчө чоңдор жасайт эмеспи, чоңдорду көргөн кичүүлөр аларды туурабай койбойт. Ошондуктан биринчи өзүбүздү өзгөртүп, кийинки муундарга өрнөк бололу.
Бул көрүнүшкө бир мисал келтирейин: Чет өлкөдөн Кыргызстанга эс алуу үчүн туристтер келди. Шаар таза, издесеңда бир таштанды таба албайсын, шаарда жүргөн, жашы да карысы да таштандыларын урнага салып жатышат. Аны көргөн чет өлкөлүктөр өз өлкөсүнө барганда бул көрүнүштү айтышат. Биз шаарыбызды таза кармоо менен чет өлкөгө жакшы жагыбыздан тааныла баштайбыз. Ошондуктан шаардын тазалыгына кайдыгер карабайлы!
Шаарга келип ар 2 метр баскан сайын эле бутуңа таштанды оролошуп, жагымсыз жагдайды жаратат. Бул таштандыларды көрүп жаның кеийт, анан «Шаардын тазалыгы «Тазалык» ишканасынын кызматкерлерине эле керекпи?»-деген суроо пайда болбой койбойт. Кээ бир адамдар айтышы мүмкүн «бул анын жумушу, кылышы керек»-деп, бирок шаар бир эле адамга тиешелүү болгудай бир ишкана эмес да! Айтор шаарды эч ким өз менчигине айландыра албайт. Демек шаардын тазалыгы баарыбыз үчүн экендигин унутпайлы!
Шаарыбыздын тазалыгы бул – шаардын өнүгүүсү! Шаардын тазалыгы үчүн баарыбыз аракет жасайлы!

Гүлдана Абдылдаева, Жалал-Абад шаары