Аймак

КЫРГЫЗ-ӨЗБЕК КАТЫШЫ КАЛЫҢДАДЫ

КЫРГЫЗ-ӨЗБЕК КАТЫШЫ КАЛЫҢДАДЫ

 2,693 Бардыгы /

         Кыргыз Республикасынын Президенти Сооронбай Жээнбековдун түздөн-түз кийлигишүүсүнөн кийин гана Оштогу жападан жалгыз «Достук» Кыргыз-Өзбек чекара бекетиндеги тоскоолдуктар жана  кезек күттүргөн тыгындар биротоло жоюлуп, эки өлкөнүн жарандарынын ары-бери үзгүлтүксүз каттооосуна ыңгайлуу шарт жаратылып олтурат.

         Абдурахман САБИРОВ, Өзбек Республикасынын Наманган облусунун тургуну, айдоочу:

Өзбекстандын Жаңы-Коргон районуна Кыргызстандан жүк ташыймын. Бул жакка дагы бош келбестен, күнүмдүк турмушка керектелүүчү товарларды жеткирип турам. Мурун узун кезек күтүп, анан ар жерден тынбай текшерип, чынында, өлө кыйналчубуз. Анан айлабыз таптакыр куругунда чекарачылар жана бажычылар сурагандарын милдеттүү түрдө берчүбүз. А азыр мындай жосунсуз жоруктар – жемкорлук дээрлик тыйылды. Ары-бери эч тоскоолдуксуз эле каттап жатабыз. Адаттагыдай упузун кезек деле жок.

Зебо НЕМАТЖАНОВА, Кыргыз Республикасы, Ош шаарынын тургуну:

– Тууган-уруктарыбыздын көпчүлүгү Өзбекстанда азыр да жашашат. Өзүм оштук жигитке турмушка чыккамын. Буга дейре жамандык-жакшылыктарга беймарал катташа алчу эмеспиз. Тескерисинче, телеграмма, же чакыруу кагазы болбосо, дароо эле артка кайтарышчу. Ошентип, маркум тууган-уруктарыбыздын тажиясына катышып, сөөгүнө дагы топурак сала албай калган күндөрдү башыбыздан далай кечирдик. Эң башкысы: мындан ары ылайым бүгүнкүдөй достук мамилебиз эч качан бузулбасын!

Мусбахон МИРЗОЕВА, Өзбек Республикасынын Анжиян шаарынын тургуну, соодагер:

–  Биз жакта жаз кадимкидей эле күчүндө. Ош шаарынынын базарларына моминтип көк чөп байма-бай ташып жатабыз. Мурдагыдай кыйынчылыктар жана бейжай тоскоолдуктар дээрлик жокко эсе. Чекарачылар жана бажычылар баары мыйзам чегинде гана иштеп жатышат. Бир сыйра текшеришип, анан күттүрбөстөн эле ары-бери өткөрүп турушат.

Баса, Кыргыз чекара кызматынын төрагасы Уларбек Шаршеев «Достук» Кыргыз-Өзбек чекара бекетиндеги күзөттө тургандар жарандардан кадимкидей акча алышат. Анан гана өткөрүшөт. Ошону үчүн кезек күткөндөр арбын» деген маалыматы төгүндөдү.

– Тескерисинче, «Достук» Кыргыз-Өзбек чекара бекетинде кошумча паспорт текшерүүчү жайларды көбөйттүк. Ошондуктан, моминтип кезек күткөндөр дээрлик тыйылды! – деди Кыргыз чекара кызматынын төрагасы Уларбек Шаршеев.

– Ал эми биз жөнүндө негизсиз ушактарды жайылтып жатышат. Аларды тараткандардын абийирине гана койдук. Анын үстүнө буларды чычалаганга жана териштиргенге убактыбыз жок! Эл өзү тараза. Кандай иштеп жатканыбызды ошолор айтышсын!

 

Алишер ТОКСОНБАЕВ, өз кабарчыбыз

Автор

Байланыш дареги

Email: aymak.kg@mail.ru

Телефон: +996 (770) 81-00-32

Факс: +996 (3722) 2-32-36

Адрес: Жалал-Абад ш. Ленин к. 17