Дамир КУЛУБАЕВ: “АТКАРУУ БИЙЛИГИНИН ЖООКЕРИМИН!”

4,752 Бардыгы /

Аймактык-административдик реформа Ош облусуна караштуу Кара-Кулжа районунда дагы абдан кызуу жүрүп жаткан чагы. Буга улай энергетикалык көз карандысыздыктын алкагында өрөөндөгү дарыяларга 4 чакан ГЭС курулуп атат. Ушулар туурасында Кара-Кулжа районунун акими Дамир КУЛУБАЕВ кабарчыбызга курган маегинде кеңири токтолду.

-Дамир мырза, Президент Садыр Жапаровдун “Пилоттук режимде Кыргызстанда Айыл Өкмөттөрүнүн жана шаарлардын деңгээлинде Административдик-Аймактык реформаны жүргүзүү жөнүндө” Указы Кара-Кулжа районунда деги кандай дегээлде аткарылып жатты экен?

-Биздин районубузда жалпы жонунан 12 айыл өкмөтү бар эле. Булар – Кара-Кочкор, Кашка-Жол, Кара-Гуз, Кеңеш, Чалма, Ылай-Талаа, Капчыгай, Ой-Тал, Кызыл-Жар, Алайкуу, Кара-Кулжа жана Сары-Булак. Чындыгында, баары тең өтө эле чачыранды жайланышкан. Ошондуктан, Кара-Кочкор жана Кашка-Жол бириктирилип Кара-Кочкор, Кара-Гуз жана Кеңеш кошулуп Кара-Гуз, Чалма жана Ылай-Талаа биргелешип Ылай-Талаа, Капчыгай жана Ой-тал кошулуп Ой-Тал, Кызыл-Жар жана Алайкуу бириктирилип Алайкуу айыл өкмөтү аталды. Ал эми Кара-Кулжа жана Сары-Булак айыл өкмөттөрү эч кандай өзгөрүүсүз эле калтырылды.

-Ошентип жаңы жобого ылайык мындан ары айыл өкмөт башчылары жергиликтүү тургундардан дайындалбайт. Эмне үчүн?

-Дал ушунун өзү тааныш-билишчиликке жана жердешчиликке биротоло чекит койду. Мындан тышкары коррупциялык көрүнүштөрдү дагы тыйды. Анан дагы айыл өкмөт башчылары арасындагы жоопкерчиликти деле ого бетер күчөттү.

-Канетсе дагы, Сиздердин дүйнөлүк жана Ата Мекендик донор уюмдар менен ийиндеше иштешип, орчундуу көйгөйлөрдөн арылуу аракетиңиздер таптакыр байкалбайт ко?

-Кантип? Жаңылышасыз! Районубузга өткөн бир жыл аралыгында 383 инвестор тартып, 866 миллион сомдук жумуш бүткөрдүк. Үч заманбап мектеп салынды. Ушуга улай бир чакан ГЭСти ишке киргиздик. Дагы үчөөнү курунуу моминтип активдештирдик. Биздин мындай аракетибиз энергетикалык көз карандылыктан бара-бара кутулууга өбөлгө гана жаратууда. Ошондой эле жергиликтүү тургундар дагы туруктуу жумуш менен камсыз этилүүдө.

-Дамир мырза, Сиз тоолуу Кара-Кулжа районунун көптөгөн жылдар бою ийгиликтүү гана жетектеп, акыры такшалдыңыз. Эми бир облусту, Кыргыз Өкмөтүн (премьер-министрликти, вице-премьер-министрликти) ыроолошсо, башарганга кудуретиңиз жетчүүдөйбү?

-Алишер, мен – аткаруу бийлигинин жоокеримин! Президентибиз, же премьер-министрибиз мага кандай жумушту сунуш этишпесин, андан баш тартууга дегеле акым жок! Эң башкысы: мен мойнума тагылган ар андай милдетти – вазийпаны чоң жоопкерчилик менен сапаттуу аткарууга бүт билимиди жана күч-кубатымды сарптоого дайым даярмын!