4,782 Бардыгы /

Бүгүнкү күндүн талабына ылайык Кыргызстандын Түштүк баш калаасындагы ар бир кардарга “Акылдуу эсептегич” орнотулду. Бул жышаан өөрчүгөн коррупцияны жок гана кылбастан, ошондой эле электр энергиясын сарамжалдуу урунууга дагы өбөлгө жаратып олтурат. Муну кабарчыбызга курган маегинде Ош шаардык электр энергиясын сатуу мекемесинин директору Маматкерим АТТОКУРОВ ачык эле моюндады.

-Маматкерим мырза, деги Ош шарында канча үй-бүлө жана мекеме-ишканалар, ошондой эле уюмдар Сиздердин кызматыңыздардан дагыле пайдаланышат?

-Ош шаары боюнча 106 миң туруктуу кардарыбыз бар. Булардын 10 миң 674ү – мекеме-ишканалар жана дагы уюмдар.  

-О-у, дегеле көп турбайбы! Эми булар ай сайын канча киловат электр энергиясын жагышат экен?

-Таңкалбай эле коюңуз. Бишкек шаарына салыштырганда Ошто, чынында, аз. Ай сайын 1 миллиард 13 миллион 688 миң 500 киловат электр энергиясы жагылат. Дүйнөлүк практикада электр энергиясы деле товар сыңары эсептелет. Ошондо оштуктар ай сайын 1 миллиард 541 миң 962 сомдук ток урунушат. Көрдүңүзбү?

-Ал эми карыздарды өндүрүү дагыле Сиздер үчүн азаптыр?

-Жо-жок! Санариптештирүүнүн бизге, энергетиктерге, куп гана пайдасы тийбедиби. Ар бир кардарга “Акылдуу эсептегич” жабдыгы орнотулган. Демек, баардык төлөмдөр дагы тегиз автоматташтырылган. Биздин атайын серверибиз бар. “Мой свет” (“Менин жарыгым”) аркылуу телефонуңуздан эле карызыңызды которуп койсоңуз болот.

-Адатыңыздарча “Акылдуу эсептегичтерди” деле кардарларга сатып ийбедиңиздерби?

-Ыя, айланайын! Дагыле бизден шек санап жатасыздарбы? Эгерде бизге ишенбесеңиз, кардарлардан өзүңүздөр жекеме-жеке сураштырып көрбөйсүздөрбү?  “Акылдуу эсептегич” жабдыктарын ар бирине бекер эле орноттук…

-Маматкерим мырза, азыркы коррупция (жемкорлук) акчанын аздыгынан жаралып жатпайбы. Айып этпесеңиздер, Сиздердин кызматкерлердин маянасы дурус эледир?

-Ош шаардык электр энергиясын сатуу мекемесиндежалпы жонунан 172 кызматкер эмгектенет. Баары тең – жалаң дасыккан адистер. Булардын орточо маянасы – 25 000 – 30 000 сом. Албетте, топук кылсак, анан дагы сарамжалдуу пайдалансак, мынча каражат турмуш-тиричилигибизге кеңири эле жетет.

Кепке тарткан: Алишер  ТОКСОНБАЕВ, өз кабарчы