381 Бардыгы /

Ош облусунда жаз келээри менен өзгөчө кырдаалдарды алдын алуу жана базарларды биротоло иретке келтирүү боюнча тыкыр текшерүүлөр жүргүзүлөт. Бул жөнүндө Президенттин Ош облусундагы ыйгарым укуктуу Өкүлү Элчибек Жантаев тапшырма бергендигин анын маалымат кызматынан кабарлашты.

          Ош облусунун жетекчиси Элчибек Жантаев райондордун акимдердин жана жарандык коргонуу кызматтарынын мүчөлөрүнүн катышуусунда атайын жыйын өткөрдү. Анын жыйынтыгында жергиликтүү бийликтин башчылары чукул арада төмөнкү иштерди жүзөгө ашырууга милдеттендирилди:

– кар эригенде пайда боло турган кырдаалдарды алдын алуу жана арык, каналдарды бүтүндөй тазалоо;

– суу каптоо коркунучу бар аймактарга мониторинг жүргүзүү жана алдын алуу чараларын көрүү;

– кар көчкү көп түшкөн аймактарда коркунучу бар жерлерди аныктоо жана алдын алуу, ошондой эле жергиликтүү калкка түшүндүрүү иштерин жүргүзүү;

– Кара-Кулжа — Алайкуу унаа жолунда көчкү жүрүүчү аймактарга такай мониторинг жүргүзүү жана керектүү техникалар менен камсыздоо;

– кооптуу деп эсептелген аймактарда жашаган тургундарды сөзсүз көчүрүү жана алардын арасында түшүндүрүү жараянын күчөтүү.

          Ошентип, Ош облусунун аймагында соода базарларды иретке келтирүү боюнча жумушчу топ дагы түзүлдү. Алар базарларды иретке келтирүү боюнча иш-чаралардын планын иштеп чыгууга, базарлардын архитектуралык нормаларга шайкештигин тыкыр текшерип, мыйзамсыз курулуштарга бөгөт коюуга, санитардык, эпидемиологиялык жана техникалык коопсуздук эрежелеринин сакталышын көзөмөлдөөгө, өрт коопсуздугу эрежелеринин сакталышын текшерүүгө, базарларда электр энергиясы үчүн төлөмдөрдү көзөмөлдөө жана электр чубалгыларынын техникалык коопсуздугун камсыздоого жана жүк ташуучу жана жеке менчик автотранспорт үчүн жабдылган унаа токтотуучу жайларды жөнгө салууга милдеттендирилди.

Алишер  ТОКСОНБАЕВ, өз кабарчы