2,593 Бардыгы /

Кыргызстандын түштүк башкалаасында жайланышкан “Боорукердик” үй-интернатын ушул тапта 25 кары-картаӊ туруктуу байырлашат. Кабарчыбыз алардын ал-акыбалын сураштырганча, жашоо-шарттары менен жеринде таанышып кайтты.

104 жаштагы Касиет эне ЖОЛДОШЕВА Ош шаарына караштуу Жапалак айылынан келип, бул жайды байырлаганына мына үч жылга аяк басты.

-“Боорукердик” үй-интернатын, чындыгында, өз үй, өлөӊ төшөгүмө айланды. Жетекчибиз Бермет Токтосунова баарыбыздын көзүбүздүн кареги менен теӊ айланып, дайыма күйпөлөктөп жаныбызда жүрөт, – деди 104 жаштагы Касиет эне ЖОЛДОШЕВА. – Карылык да. Кан басымым тынбай көтөрүлүп турат. Ошону үчүн медайымдар менин саламатчылыгыма тынбай көз салышат. Бир уул, бир кыз төрөгөмүн. Уулум 64, а кызым 49 жашында каза табышты. А булардын балдары бүт гөртириликтин айынан Москва шаарына жумуш издеп кетишти. Үйдө мен жалгыз каралбай калганымда, Жапалак ФАПтын фельдшери ушул жерге алып келип жайгаштырды. Жакында бирөөлөрдөн эшиттим. 21 жаштагы неберем Москвада жүрүп үйлөнүп, анан кыздуу болушуптур. Бирок, мага чалыша элек. Баарын теӊ сагындым… Барган сайын бугум күчөп, алардын үнүнө моминтип зар болуп олтурам, айланайын!..

А Рахаткан АБЖАЛОВАнын жашы алтымыш алтыны таяды. Кара-Суу районунун Кадырша айылынан.

-Үй-бүлө күтпөгөндүктөн, эч балалуу болбодум. “Боорукердик” үй-интернатынын босогосун аттаганыма туура беш жыл толду. Өкмөт тарабынан бизге камкордук абдан күч! – деди Рахаткан АБЖАЛОВА. – Жакында эле карылар күнүндө Ош шаарынын мэри Таалайбек Сарыбашев бизден кабар алганча, катарыбызда кошо олтуруп чайлашып, муӊ-зарыбызды зерикпестен тыӊдап, бөксөргөн көӊүлүбүздү кыйла эле көтөрүп кетти. Мына, Сооронбай Жээнбеков Президентикке шайланган бери кары-картаӊдарга камкордук ыраса күчөдү. Эӊ башкысы: Кудай жетекчилерибизге дайыма нысап, элибизге токчулук, ал эми жергебизге тынчылык ыроолосун!

Ошентип, 25 ата-энебиздин жыпжылуу уясына айланган Ош шаарындагы “Боорукердик” үй-интернатынын тамагынан ооз тийгенче, кадырман карыларыбыз менен чер жазылганча сүйлөштүк.

-Биздин “Боорукердик” үй-интернатыбыз Ош шаарынын бюджетинен жетиштүү түрдө каржыланат. Кийим-кечебиздин жана тамак-ашыбыздын дагы чыгымдарын бүт Ош калаасынын мэриясы көтөрөт, – деп кепке кошулду Ош шаарындагы “Боорукердик” үй-интернатынын башчысы Бермет ТОКТОСУНОВА.

– Биздин бардык чоӊ-кичине маселелерибиз Ош шаарынын жетекчилиги тарабынан ыкчам чечилип келатат. Мындан тышкары айрым жеке ишкерлерибиз дагы демөөрчүлүк кылып турушат. Бул жашоодо өмүрдү өлүм коштоп жүрөт эмеспи. Биз деле эл сыӊары көзү өткөндөрдүн бардык  ызаатын жасап, жол-жобосу  менен акыркы сапарга узатабыз.

Сөзүнүн соӊунда бизди узатып жатып Ош шаарындагы “Боорукердик” үй-интернатынын башчысы Бермет ТОКТОСУНОВА: “Аттиӊ… Дегеле өлкөбүздө, Кыргызстанда, карылар үйү таптакыр болбосо экен!” деген аруу максатын жашырган жок. Биз дагы бул идеяны кубаттап, дал ушул асыл тилектин кабыл болушун жараткандан миӊ мертебе суранып кайттык.  

Алишер ТОКСОНБАЕВ, өз кабарчыбыз