2,946 Бардыгы /

Ош шаарындагы жүздөгөн оор жүк ташыган автоунаалардын шоопурлары нааразычылык акциясына чыгышкан. Алар Кытайдын бажы көзөмөлүндөгү жаңы эреже таптакыр мыйзамсыздыгын жана бул талап айдоочуларды жөн гана убара кылып жаткандыгын баса белгилешкен. Бул маселе ушул тапта канчалык деңгээлде оң жагына чечилип жатат? Ушул өңүттө өз кабарчыбыз Автомобиль жана сууда жүрүүчү транспорт Мамлекеттик агенттигинин Ош аймактык башкармалыгынын жетекчиси Болотбек ТЕЗЕКБАЕВди кепке тартты.

– Болотбек мырза, Кытай Эл Республикасынын Улуу Чат ооданында оштук айдоочулар бажы бекетинен өтө алышпай кармалып турушат дешти эле. Мунун канчалык чындыгы бар?
– Оштун шоопурлары айдаган 27 жүк ташыган автоунаа тент (чатыр) менен жабылган. Муну биз өзүбүз тайылап жасаган жокпуз да. Заводдон өзү дал ушундай тейде ысык-суукта жүк ташыганга абдан ылайыкташтырылып чыгарылган. Анан баары эл аралык стандартка толук бойдон жооп берет. Тилекке каршы. Кытай бажысы муну таптакыр эске албастан, бизне таандык баардык автоунааларды артына эптеп кайтарышыптыр.
– Эмне себептен?
– 2014-жылы Кубанычбек Жумалиев премьер-министр кезинде оор жүк ташыган автоунаалар тент (чатыр) жабылып жүк ташуусуна Кытай Эл Республикасы менен эки тараптуу макулдашууга кол коюлган. Бул документ ушул тапта дагыле күчүндө. Бирок, биз айлабыз таптакыр куруганда Кытайдагы кесиптештерибизден бул келишим эмне себептен бир тараптуу гана бузулуп жаткандыгын катуу сураштырдык. Мунун жыйынтыгын расмий сүйлөшүүлөрдөн соң гана жар салмакчыбыз.
– Бул эмне дегениңиз?
– Ушул тапта Кыргызстандын автоунаа жана жол министринин орун басары Гүлмира Абдралиева жогорудагы маселелерди жөнгө салуу максатында Кытайда иш сапары менен жүрөт. Аны коңшу мамлекетке премьер-министр Сооронбай Жээнбеков атайылап жөнөткөн. Өз ара расмий сүйлөшүүлөрдөн соң гана бир топ көйгөйлөр жеринде дарооо чечилет деп биз дагыле үмүттөнүп атабыз.
– Ага дейре оштук айдоочулар “Үзгүлтүксүз нааразычылык акциясын жарыялап, мөөнөтсүз иш таштоо баштайбыз!” деп жатышпады беле?
– Ушундай максатта жүрүшкөн оштук айдоочулар менен Ош облусунунун жетекчилери, ички иштер министрлигинин, улуттук мамлекеттик коопсуздук комитетинин өкүлдөрү бетме-бет жолугушуп, маселени чырдашпастан жана мындан ары ырбатпастан диалог жолу менен гана чечүүнү сүйлөшүштү. Акыры орток пикирге келишти.
– Болотбек мырза, кокус Кытай тарап келишимди дагыле бузуп, кайра эле айнысачы?
– Дүйнөлүк практикада Кытайбы, же башка мамлекетпи, эки тараптуу келишимге атайын кол коюлуп, ал мыйзамдуу түрдө күчүнө кирип, анан токтоосуз аткарылышы кажет! Ошондуктан, биздин дагы маселени оң жагына гана чечкенге аракетебиз күч. Антпесек, мындайча айтканда, өз ара түшүнүшпөсөк, эки тараптуу мамиле чындап эле бузулат. А аны кайрадан калыбына келтирүү анда түккө дагы арзыбай калат жана абдан көп убакытты гана талап кылат.

Алишер ТОКСОНБАЕВ, өз кабарчыбыз