1,815 Бардыгы /

Урматтуу бүтүрүүчүлөр!Бүгүн сиздер мектепти аяктап чоң турмушка кадам таштап турасыздар. Бул жолдо ар бириңиздерге албан ийгилик жана жетишкендиктерди каалайм!

Он бир жыл бою мектеп турмушунда агай-эжекелерден таалим-тарбия алдыңыздар. Алдыңыздарда ошол алган билимди туура пайдаланып, ата-энеңиздердин көптөн күткөн үмүтүн актаган, мамлекеттин мыкты кадры, татыктуу инсан болуп калыптануу милдети бар.

Бул жылы Жалал-Абад облусунда 9 миң 578 окуучу 11-классты, 19 миң 133 окуучу 9-классты аяктап жатат. Бүтүрүүчүлөрдүн акыркы коңгуроо салтанаты абалга жараша онлайн тартипте өткөрүлүүдө. Мындай чектөө коопсуздукту камсыздоо максатында кабыл алынды. Пандемиянын шартында аралыктан билим алуу мектеп окуучуларына да оңой болгон жок. Мындагы кырдаалда мугалимдер менен окуучулардын заман талабына ылайык жаңы технологияларды өздөштүрүү жөндөмдүүлүгү жогорулады. Алдыда жалпы республикалык тесттирлөөнүн жыйынтыгы менен жогорку баллдарды камсыздашыңарга тилектешмин. Кээ бириңер жергиликтүү жогорку окуу жайларда окууну улантасыңар, айрымдарыңар чет жакта окуйсуңар.

Силер алган билимиңерди жана жөндөмүңөрдү өлкөбүздүн өнүгүүсү үчүн пайдаланасыңар деп ишенем. Кадырлуу бүтүрүүчүлөр!Ар бириңер алдыга койгон максатыңарга жетип, кесипкөй инсан болушуңарды каалайм! Турмушуңарда ар дайым ийгилик коштоп жүрсүн! Кыргызстандын келечегин курган элибиздин татыктуу улан-кыздарынан болгула!Абсаттар Сыргабаев,Министрлер кабинетинин Жалал-Абад облусундагы ыйгарым укуктуу өкүлү.

WWW.