1,878 Бардыгы /

Париждин ажайып жайларынын бири – Эйфель мунарасын дат басып, капиталдык ремонтко муктаж. Бирок 2024-жылы өтө турган Олимпиада оюндарынын алдында аны кайрадан жөн гана сырдап коюшуда. Бул тууралуу Marianne француз журналы өз булактарына таянуу менен билдирди.

Журналдын колуна тийген жашыруун отчетторго караганда, Эйфель мунарасындагы дат жана жаракалар 2014-жылы эле аныкталган. 2016-жылы мунаранын 884 жери зыянга учураганы, анын ичинден 68и конструкциянын бекемдигине тобокелчилик жаратары белгилүү болгон.

“Эгер Гюстав Эйфель (мунараны курган инженер) бул жерге келсе, жүрөгү кармап калмак”, – деп билдирген мунаранын атын атагысы келбеген менеджери.

Ушул тапта мунараны 2024-жылы Парижде өтө турган Олимпиада оюндарына карата жыйырманчы жолу сырдап жатышат. Үстүртөдөн жасалган ремонттун баасы 60 миллион еврону түзөт.

Журналдын эксперттери мунаранын эски боекторун толугу менен алып, кайрадан сырдоо керектигин, антпесе коррозия күчөй турганын белгилешкен. Бирок мунараны башкарган жана 99% Париж мэриясына таандык болгон компания туризмден түшкөн кирешени жоготуп албоо үчн аны узак мөөнөткө жабууну каалаган жок.

Темирден жасалган, бийиктиги 324 метр жана салмагы 7300 тонна мунара 1889-жылы тургузулган. Ал азыр тыюу салынган, бирок ошол кезде датка каршы эң мыкты каражат болгон коргошун жошосу менен сырдалган. Эйфель бул сыр мунаранын бекемдигине кепилдик берет жана дат басуудан сактайт деп эсептеген.

Эйфель мунарасы жыйырма жыл туруп, андан кийин алынып салынмак. Бирок ага кылдат мамиле жасалып келгендиктен, азыркыга чейин Франциянын символдорунун бири бойдон калды.

Жыл сайын Эйфель мунарасына 6 миллиондой турист келет.

WWW.