981 Бардыгы /

1-августта Казакстандын Жезказган шаарында “Казахмыс” корпорациясына кызмат көрсөткөн Tranco Zhezkazgan темир жол компаниясынын жүздөгөн жумушчусу тынч митингге чыгып, жумуш берүүчүгө карата нааразылыктарын билдиришти.

Бул аталган компаниянын жумушчуларынын биринчи жолку митинги эмес. 2020-жылы декабрда алар бир нече талап менен нааразылык акциясына чыгышкан. Анда компания жетекчилери жумушчулардын маселесин чечүүнү убадалаган. Бирок талаптардын көбү бүгүнкү күнгө чейин аткарылбагандыктан, алар кайра митингге чыгууну чечишкен.

Чогулгандардын алдына шаардын акими менен “Казахмыс” корпорациясынын башкармалыгынын төрага орун басары чыгып, маселени талкуулоо үчүн жумушчулардын демилгелүү тобун имаратка чакырышты. Жумушчулар сүйлөшүүлөрдү улантуу үчүн азыр башкы кеңсеси Алматыда жайгашкан Tranco акционердик коомунун жетекчилигин күтүп турушат.

Митинг катышуучулары Tranco Zhezkazgan компаниясынын курамынан чыгып, “Казахмыстын” курамына кирүүнү, мурдагы сүйлөшүүлөрдө макулдашылгандай ар алты ай сайын айлыкты 50% жогорулатууну, эмгек өргүүсүн 30 календарлык күнгө чейин узартууну, ар бир жумушчуну жана анын үй-бүлө мүчөсүн социалдык пакет менен камсыз кылууну, зыяндуу эмгек шарттары үчүн кошумча акы төлөөнү жана Темир жолчулар күнүндө бериле турган сыйакыны көбөйтүүнү талап кылууда.

Мындан тышкары чогулгандар жумушчулардын кол тийбестигин камсыз кылууну жана аларды (өзгөчө демилгелүү топтун мүчөлөрүн) ыктымал куугунтуктоолордон коргоону талап кылып жатышат.

Журналисттер жумушчулардын бул талаптары боюнча комментарий сурап “Казахмыс” корпорациясына кайрылышкан. Бирок компания өкүлү талаптардын көбү Tranco Zhezkazgan’га тиешелүү экенин айтып, ошол компанияга кайрылууну сунуштады. Бирок кабарчылар Tranco Zhezkazgan менен байланыша алышкан эмес.

Ал ортодо митинг катышуучулары “Азаттыктын” казак кызматына полиция бир же эки жумушчуну кармап кеткенин билдиришти. Жергиликтүү полиция департаменти бул маалыматты ырастаган жок.

WWW.