1,437 Бардыгы /

Тажикстанда Тоолуу Бадахшандын бейформал лидери жана мурдагы командири Толиб Аембековдун экинчи уулу, 25 жаштагы Хасанали Абдурахмонов 12 жылга эркинен ажыратылды. Бул тууралуу “Озоди” өз булактарына шилтеме жасоо менен билдирди.

Маалыматка караганда, Абдурахмонов бейбаштыкка, курал-жаракты мыйзамсыз сактоого жана уюшкан кылмыштуу топтун ишине катышууга күнөөлөнгөн. Сотто ал айыптоолорду четке каккан.

Хасанали Абдурахмонов жана анын улуу агасы Гуломали Аембеков 23-июлда кармалган. Буга чейин Гуломали Аембеков, Хайримамад Дустмамадов жана Аслан Гулобов генерал Абдулло Назаровдун өлүмүнө күнөөлүү деп табылып, өмүр бою эркинен ажыратылганы кабарланган.

Толиб Аембеков 11-июнда башка жергиликтүү лидерлер менен чогуу кармалган. Расмий маалыматта алар бир катар оор кылмыштарды жасоого, анын ичинде киши өлтүрүүгө, бейбаштыкка, талоончулукка, аткезчиликке жана маңзат, ок-дары, баалуу таштарды мыйзамсыз жүгүртүүгө, кылмыштуу топ түзүүгө, жапырт башаламандыкка айыпталып жатканы айтылган.

WWW.