1,101 Бардыгы /

Журналисттерди коргоо комитети (CPJ) тажик бийлигин камактагы жарандык активисттер Ульфатхоним Мамадшоева менен Хушруз Жумаевди бошотууга чакырды.

“Тажикстандын бийлиги Ульфатхоним Мамадшоева менен Хушруз Жумаевди эркиндикке чыгарып, аларга тагылган бардык айыптарды жана алардын ишиндеги “жашыруун” деген грифти алып салышы керек”, – деп жазылган комитеттин расмий билдирүүсүндө.

CPJ журналисттердин иши боюнча маалымат берүү өтүнүчү менен Тажикстандын Башкы прокуратурасына электрондук кат жөнөткөнүн, бирок эч кандай жооп болбогонун белгилеген. Бүгүнкү күндө Тажикстанда бери дегенде эле алты журналист оор кылмыштарга айыпталып камакта отурат.

Көз карандысыз журналист жана жарандык активист Ульфатхоним Мамадшоева быйыл 18-майда Тоолуу Бадахшан автоном облусунун борбору Хорог шаарындагы жапырт нааразылык акциясын уюштурган деген айып менен кармалган. Ага каршы “Тажикстан Республикасынын конституциялык түзүлүшүн күч менен кулатууга аракет кылуу” беренеси менен кылмыш иши козголгон. Мамадшоева кармалганга чейин социалдык түйүндөрдөгү баракчалары аркылуу Хорогдогу митингдерге эч кандай тиешеси жок экенин билдирген.

Соцтармактарда Хушом Гулям деген ысым менен таанымал активист Хушруз Жумаев 20-майда кармалган. Ал өзүнүн ютуб-каналын иштетип, негизинен памир элинин тарыхы, маданияты жана тилдери тууралуу берүүлөрдү даярдап келген. Бийлик аны конституциялык түзүлүштү күч менен кулатууга ачык чакырык жасоого айыптап жатат.

Быйыл май айында Тоолуу Бадахшан автоном облусундагы Хорог шаары менен Рушан районунда жергиликтүү тургундардын наарызылык акциялары өткөн. Бийлик аталган аймакта “антитеррористтик операция” жарыялап, анын жүрүшүндө 16 киши өлтүрүлгөнүн билдирген. Жергиликтүү тургундар каза болгондор расмий кабарлангандан кыйла көп экенин айтышкан.

Аталган операциянын алкагында 200дөн ашык киши кармалган. Бийлик аларды нааразылык акцияларын уюштурууга жана башка оор кылмыштарга айыптаган. Бирок кармалгандардын жакындары алар митингге өз укуктарын коргоп гана чыгышканын билдирүүдө.

WWW.