1,887 Бардыгы /

          ОШ. Ош шаардык соту Ички иштер министрлигинин кызматкеринин ишин ар тараптуу карап, ал мас абалында кызматынан ашкере пайдалангандыгы үчүн 500 миң сом айыпка жыкты. Ал эми жетекчилиги тартипти бузган кесиптешин органдан дароо айдап жиберди.

Соттун материалына караганда, Кыргызстандын Түштүк башкалаасынын Ички иштер башкармалыгынын нөөмөт бөлүмүнүн башчысынын жардамчысы – 37 жаштагы М.Т.Б. Кылмыш-Жаза Кодексинин 338-беренесинин 2-бөлүгүнүн 2-пунктун («Күч колдонуп, же аны менен коркутуп-үркүтүп кызматын ашыра пайдалануу») орой түрдө бузган. Анткени, милиционер М.Т.Б.  агезде кызмат учурунда жүргөн. Кийинки күнү саат 09.00дө гана нөөмөтүн тапшырган. Ал кызматтык формачан кечки саат  18.00дө көчөдө 1969-жылы туулган жаранды жолуктурган. Экөө капысынан сөз талаша кеткен. Жаран ал жерден кетип калгандыгына карабастан, аны милиционер артынан аңдып үйүнө дейре ээрчип барган. А түгүл турагына атайылап кирип, ашканасына дагы уруксатсыз баш баккан. Андан ары жаранды кадимкидей уруп-токмоктогон. Бабырланган тарап аргасыздан Ош шаардык ички иштер башкармалыгынын патрулдук милициясынын нарядын чакырткан. Ошондо гана милиция Ош шаардык ички иштер башкармалыгынын нөөмөт бөлүмүнүн башчысынын жардамчысын Сулайман Тоо милиция бөлүмчөсүнө алпарган. Андан ары наркологияга жеткирип, медициналык текшерүүдөн дагы өткөрүшкөн. Буга улай Ички иштер министрлиги өзү дагы ички иликтөө жүргүзүп, анын жыйынтыгында бүт фактылар аныкталып, милиционер жумушунан токтоосуз бошотулган. Жапа чеккен тараптын милиция кызматкерине доосу жоктугун билдирген тосмо арызына карабастан, Ош шаардык соту органдын өкүлүн кызматынан ашкере пайдалангандыгы үчүн 500 миң сом айыпка жыкты.

Соттогу маалыматка ылайык, 37 жаштагы М.Т.Б. Ош шаардык Ички иштер башкармалыгынын нөөмөт бөлүмүнүн башчысынын жардамчысы болуп иштеп жүргөн. Окуядан кийин наркологияга алып барганда анын мас экендиги аныкталды. Бирок тергөөнүн жүрүшүндө ал ичимдик ичкендигин таптакыр моюндаган эмес!

«Нөөмөттөн чыгып үйүмө барып, башым ооругандыктан, жазуусун карабай эле бир дарыны ичип алыптырмын. Андан кийин өзүмө өзүмө келсем, Сулайман-Тоо милиция бөлүмүндө экенмин, — дейт айыпталуучу – Кыргызстандын Түштүк башкалаасынын Ички иштер башкармалыгынын нөөмөт бөлүмүнүн башчысынын жардамчысы 37 жаштагы М.Т.Б.

Аттиң… Соттун мындай адилет чечими башка милиция кызматкерлерине ачуу сабак болсо кана?!?

Алишер ТОКСОНБАЕВ, өз кабарчы