1,998 Бардыгы /

ЖАЛАЛ-АБАД. Жалал-Абад облусунун Базар-Коргон районуна караштуу Сай-Коргон айылынын 72 жаштагы тургуну кутурмадан кесепетинен каза тапты. Бул фактыны Жалал-Абад райондор аралык ооруларды алдын алуу жана мамлекеттик санитардык эпидемиологиялык көзөмөл борборунун бөлүм башчысы Парикан Эшенкулова ырастады.

Парикан Эшенкулованынайтымында, кутурмадан каза тапкан жаран гипертонияга байланыштуу дарыгерлердин такай көзөмүлүндө турган экен. А түгүл 1-сентябрда Базар-Коргон аймактык ооруканасына кайрылып, адегенде терапия бөлүмүнө жаткырылган.

– Терапия бөлүмүнө жаткырылгандан кийин 23 саат өткөн соң бейтап деми кыстыгып жаткандыгын айтып, дене табы улам көтөрүлүп, алы дагы куруп, коркуу сезимдери пайда болгон. Дарыгерлер чогулуп консилиум өткөрүшүп, дароо инфекционист чакыртылат. Кутурмага күмөндөлүп, жугуштуу оорулар бөлүмүнө жаткырылат. 2-сентябрда облустан биз дагы бардык. Суудан, шамалдан, жарыктан, үндөн коркуп, анда кутурмса оорусунун белгилери даана байкалып калыптыр. 3-сентябрда шилекейи агып, коркуусу улам күчөп, ошол эле күнү каза тапты. 4-сентябрда санитардык эрежелерди сактоо менен дарыгерлер жууп-тазалап, жергиликтүү бийлик өкүлдөрүнүн катышуусунда маркумдун сөөгү  жерге коюлду, – деп кошумчалады Жалал-Абад райондор аралык ооруларды алдын алуу жана мамлекеттик санитардык эпидемиологиялык көзөмөл борборунун бөлүм башчысы Парикан Эшенкулова.

Баса, каза тапкан кишинин баласы быйыл апрелде талаадан күчүк таап алып, үйүнө алып келген. Болжол менен 15-20 күндүк күчүк үйгө келген коноктун бутун каап таштаган. Үй ээси аны байлап жатканда, анын оң колун капкан экен.

– Күчүк тиштеген колун аракка жууп коюп, ошол бойдон жүрө бериптир. А күчүктү үй ээлери «Эки адамды тиштеди» деп өлтүрүшүп, андан ары айылдын четине ыргытып жиберишиптир, – деп кошумчалады санитардык дарыгер Парикан Эшенкулова.

Ушул тапта маркум менен чогуу жашаган үч кишиге кутурмага каршы вакцина сайылды. Бул – Жалал-Абад облусунда кутурмага байланыштуу быйылкы биринчи окуя. Былтыр Аксыда ит каап алган киши дагы кутурмадан каза тапкан.

Алишер ТОКСОНБАЕВ, өз кабарчы