1,317 Бардыгы /

ЖАЛАЛ-АБАД. Сузак райондук ички иштер бөлүмү тарабынан зордук-зомбулуктардын алдын алууга багытталган тегерек стол өткөрүлдү.

Жалал-Абад ОИИБдин басма сөз кызматы билдиргендей, тегерек столго Сузак РИИБдин начальнигинин орун басары Канатбек Саркаров, билим берүү, балдарды коргоо бөлүмдөрүнүн кызматкерлери, социалдык адистер, аксакалдар соту, аялдар кеңеши, дин өкүлдөрү, жергиликтүү кеңештин депутаттары, мектеп мугалимдери жана активист окуучулар катышышты.

Тегерек столдун жүрүшүндө үй-бөлөлүк зордук-зомбулуктардын алдын алууда милиция тарабынан көрүлүп жаткан чаралар баяндалды. Коомдогу жат көрүнүштөргө бөгөт коюуда бардык жарандар кайдыгер карабастан, тартип сакчылары менен биргеликте аракеттенүү зарылдыгы белгиленди. Эрте никеге турган үй-бүлөлөрдө зордук-зомбулук көп болоору, анын алдын алуу керектиги, жаш балдарга татыктуу тарбия берүүдө ата-эненин орду чоң экендиги айтылды.

Мындан сырткары катышуучуларга атайын даярдалган видеороликтер, сахналаштырылган көрүнүштөр көрсөтүлдү.