9 Бардыгы /

Кечээ, 9-мартта Кыргыз Республикасынын Президентинин Жалал–Абад облусундагы ыйгарым укуктуу өкүлү Тилек Текебаев Аксы районунун Үч–Коргон айыл аймагында жайгашкан Жел–Тийбес насостук станциясына барып, жергиликтүү тургундар менен жолугушту.

Маалыматка ылайык, насостук станциядагы курулуш-монтаждоо иштери 2025-жылдын август айында Суу ресурстары кызматынын алдындагы “Аксы райондук суу чарба башкармалыгы” мамлекеттик мекемеси тарабынан башталган. Бирок каржылоонун убактылуу токтошунан улам курулуш иштери үзгүлтүккө учурап, сугат мезгили жакындап калгандыгына байланыштуу жергиликтүү тургундардын тынчсыздануусун жараткан.

Курулуш иштерин тендер аркылуу уткан “Инженерная защита” жана “ГидроТех.Строй” ЖЧКлары аткарууда. Долбоордун алкагында 5800 метр суу түтүгүн алмаштыруу каралган. Келишимдин жалпы наркы 260 млн. 749 миң 775 сомду түзөт.

Облус башчысы курулуш иштерин жеринен көрүп, жумуштарды тездетүү зарылдыгын белгиледи. Ал тиешелүү мекемелерге жумушчулардын жана атайын техникалардын санын көбөйтүү боюнча ыкчам чараларды көрүү тапшырмаларын берди.

Мындан тышкары, акыркы алты ай ичинде курулуш иштеринде олуттуу жылыш болбогону белгиленип, кырдаалды жеринде талдап, тиешелүү чечимдерди кабыл алуу максатында атайын жумушчу комиссия түзүү тапшырмасы берилди.

Ыйгарым укуктуу өкүл Кош-Дөбө айыл аймагындагы Кызыл-Алма капчыгайында курулушу пландалган суу сактагычтын орду менен таанышты. Долбоор боюнча суу Падыша-Ата дарыясынан Беш-Батман каналы аркылуу алынат. Суу сактагычтын көлөмү 9,5 млн. куб метр болуп, анын жардамы менен 2000 гектар жаңы жер жана 1587 гектар жердин суу менен камсыздалышы жакшыртылат.