996 Бардыгы /

Орусияда мобилизация жарыялангандан кийин чет өлкөлөргө, анын ичинде Өзбекстанга агылган орус жарандарынын көптүгүнөн улам Ташкенттеги мейманканаларда бош орундар калбай калды. Бул тууралуу “Озодлик” радиосу кабарлады.

“Шаардагы мейманканалардын акысы кескин жогорулап кетти. Көпчүлүгүндө бош орундар калбай калды. Биздеги бөлмөлөрдүн баарын сентябрдын аягына чейин ээлеп коюшту”, – деди “Ташкент” мейманканасынын кызматкери.

Өзбекстандык блогер жана коомдук ишмер Азиза Умарова “Фейсбук” баракчасына орусиялыктардын агымынан улам Ташкенттеги батирлердин ижара акысы жана турак жай баалары жогорулай турганын жазды.

Азырынча Өзбекстандын Ички иштер министрлиги Орусияда мобилизация жарыялангандан кийин өлкөгө канча орус жараны келгени боюнча маалымат бере элек. Ал ортодо социалдык түйүн колдонуучулары орусиялыктардын агымын көзөмөлдөө жана аларга карата конкреттүү эрежелерди киргизүү зарылдыгын жаза башташты.

21-сентябрда Владимир Путин Орусияда жарым-жартылай аскердик мобилизация жарыяланганын билдиргенден кийин кыска убакыттын ичинде эле орус жарандары визасыз бара ала турган өлкөлөргө авиабилеттер сатылып кеткен.

22-сентябрда Москва-Ташкент каттамына авиабилет баасы дээрлик 9 миң долларга чейин жогорулаганы кабарланган.

“Эгер Ташкентке “Внуково” аэропортунан учам десеңиз билеттер 603 050 рубль болот. Кетүүнү каалагандар өтө көп, суроо-талап чоң. Эртеден бери мага билет таап берүү өтүнүчү менен 200дөн ашык киши телефон чалды”, – деп билдирген анда Орусияда авиабилет сатуу менен алектенген ишкер Фарход Темиртирнаков.

WWW.