1,428 Бардыгы /

Украинанын Энергетика министрлиги 11-октябрдан тарта Евробиримдикке электр энергиясын экспорттоону токтото турганын билдирди. Бул Орусиянын үстөккө-босток ракеталык соккуларынан кийин энергетикалык системаны турукташтыруу үчүн керек.

Ведомство Москваны Украинага каршы энергетикалык террорго жана Евробиримдикке энергетикалык басымды күчөтүүгө айыптады.

Энергетика министрлиги Киев ЕБ алдындагы милдеттенмелерин Запорожье АЭСи токтогон маалда да аткарып келгенин, бирок энергообъектилерди жапырт аткылоо электр кубатын экспорттоону токтотууга мажбурлап жатканын эске салды.

10-октябрдын таңында Орусиянын күчтөрү Украинанын шаарларына жапырт ракеталык сокку урду. Киевде жана Днепр, Харьков, Житомир, Одесса, Николаев, Тернопол, Винница, Кривой Рог, Запорожье, Львов баштаган ондогон шаарларга аткылоо болду. Бир катар объектилер талкаланып, ондогон адам өлдү.

Украина президенти Владимир Зеленский өлкөнүн бардык аймагы чабуулга кабылганын, башкы бутага жарандык объектилер, өзгөчө энергетикалык объектилер алынганын айтты.

Орус президенти Владимир Путин соңку чабуулдарды Крым көпүрөсүндөгү жарылууга жооп жаза катары мүнөздөдү.

WWW.