759 Бардыгы /

БИШКЕК. АКШнын Эл аралык өнүктүрүү боюнча агенттиги (USAID), Кыргыз Республикасынын Саламаттыкты сактоо министрлиги жана Кыргыз Республикасынын Маданият, маалымат, спорт жана жаштар саясаты министрлиги Баткен, Жалал-Абад, Чүй облустарында жана Бишкек шаарында эмдөөнүн көлөмүн жогорулатуу максатында үзгүлтүсүз иш алып барышмакчы. Аталган иш-чаралар саламаттыкты сактоо тармагындагы адистерди окутууну, иш-чарага жергиликтүү активисттерди тартууну жана дагы COVID-19 вакцинациясынын артыкчылыктары жөнүндө маалыматты ыкчам таратууну ичине камтыйт. Ошентип, бул маанилүү иш-чаралар ушул жылдын 10-ноябрында өткөн COVID-19га каршы аракеттерине арналган өнөктөштүк жыйындын негизги темасына айланды.

Баса, аталган жолугушуунун жүрүшүндө USAID эпидемиологиялык маалымат, саламаттыкты сактоо тармагындагы адам ресурстарын башкаруу жана COVID-19 инфекциясынын жайылышын алдын алуу жана эмдөөнү көбөйтүү үчүн стратегиялар менен кеңири тааныштырды. Буга дейре Чүй облусунун үч районунда калкты эмдөө боюнча USAIDдин колдоосу аркасында жүргүзүлгөн иш-аракеттердин аркасында эмдөө деңгээлин 8 пайызга жогорулатууга мүмкүндүк жаралды. Ушундай эле иш-чараларды эмдөө деңгээли өтөт төмөн Баткен, Жалал-Абад жана Чүй облустарында, ошондой эле Бишкек шаарында дагы өткөрүү пландаштырылууда. Мунун негизги максаты – кыргызстандыктардын ден соолугуна олуттуу коркунуч туудурган COVID-19 вирусунун жаңы түрлөрүнүн пайда болушуна таптакыр жол бербөө.

• Баса, АКШ менен Кыргыз Республикасынын COVID-19га каршы

күрөшүү боюнча кызматташтыгынын алкагында 4 миңден ашык дарыгерлер, лаборанттар жана башка адистер COVID-19 аныктоо, алдын алуу жана дарылоо боюнча окуудан өтүштү, – деп билдирди USAIDдин саламаттык сактоо жана билим берүү бөлүмүнүн башчысы Ниша Гупта. – Мындан тышкары USAID Кыргыз республикасы боюнча түрдүү медициналык мекемелердин ишин күчөтүү максатында 1,4 млн долларлык жабдууларды дагы тартуулады. Бул жабдуулар COVID-19 менен гана эмес, башка жугуштуу оорулар менен күрөшүүдө дагы өтө маанилүү. 

Айтмакчы, пандемия – таажы илдети башталгандан бери USAID Кыргыз Республикасына COVID-19 менен күрөшүү үчүн жалпысынан 10 миллион АКШ доллардан ашык каражат ажыратты. АКШ ошондой эле COVAX мекемеси аркылуу Pfizer-BioNTech вакцинасынын 450 миң дозасын дагы тапшырды.

Алишер ТОКСОНБАЕВ, өз кабарчы