1,155 Бардыгы /

ОШ. Кыргызстандын Түштүк башкалаасында заманбап жаңы форматтагы Калкты тейлөө борбору ишке киришти. Анын ачылышына өлкөбүздүн санариптик өнүктүрүү министринин орун басары Айдарбек Мамкеткадыров, Ош шаарынын мэри Алмаз Мамбетов, “Инфоком” мамлекеттик ишканасынын директору Асел Кененбаева жана Калкты каттоо департаментинин директорунун орун басары Элиза Эсеналиева катышышты.

Кыргыз Республшикасынын санариптик өнүктүрүү министринин орун басары Айдарбек Мамкеткадыров баса белгилегендей, Кыргыз Республшикасынын президентинин “Калкка мамлекеттик жана муниципалдык кызмат көрсөтүүлөрдүн жеткиликтүүлүгүн жана сапатын жогорулатуу боюнча мындан аркы чаралар жөнүндө” Жарлыгын жүзөгө  ашыруунун алкагында Жаңы калкты тейлөө борбору кызмат көрсөтүүлөрдү оптималдаштыруу жана өркүндөтүү боюнча дагы бир кадам болмокчу. Бул иштин сапатын, тейлөөнү жакшыртат, ошондой эле жарандарды кабыл алуу ылдамдыгын жогорулатат жана убакытты дагы үнөмдөйт.

Ош шаарынын мэри Алмаз Мамбетов өз сөзүндө жаңы Калкты тейлөө борборунун артыкчылыгы катары анын аянтын баса белгиледи. Калаа мэри имараттын аянты 1300 чарчы метрден ашык экендигин, бул узун кезектердин алдын ала тургандыгын баса белгиледи. Маалыматка караганда, заманбап борбор “Бирдиктүү терезе” принцибинде түзүлгөн. Бул Ош шаарынын тургундарына жана конокторуна дагы мамлекеттик кызматтарды ашыкча бюрократиясыз алууга мүмкүнчүлүк жаратат. Жапаңы имаратта мында келгендер жана кызматкерлер үчүн бардык керектүү шарттар жаратылган. Анын жалпы аянты 1300 чарчы метр, ыңгайлуу кирүүчү жолдор жана 100 унаа үчүн унаа токтотуучу жайы дагы бар. Ал эми документтерди каттоо жана кабыл алуу үчүн 35 “Терезе”, өзүнчө маалымат берүү кызматы жана сүрөткө түшүүчү жай, кенен күтүү залы, балдардын оюн аянтчасы бар эне-бала бөлмөсү уюштурулган. Мындан стышкары нотариустар жана банктык кассалар дагы бар. Ал эми мүмкүнчүлүгү чектелген адамдарды кабыл алуу үчүн биринчи кабатта өзүнчө кааана каралган, анда тездетилген иш кагаздарын жүргүзүү кызматы дагы көрсөтүлөт. Калкты тейлөө борбору күнүнө 1000ден ашык адамды тейлегенге жарайт. Жаңы Калкты тейлөө борборунун ачылышы менен жарандар “Earlyone” мобилдик тиркемеси аркылуу өз сапарын дагы пландаштырып, ыңгайлуу убакытты тандоо мүмкүнчүлүгүнө ээ болушту. Тиркеме Play Market жана App Store үчүн жеткиликтүү.

Ошентип, заманбап борбор Ош шаарынын Касымбеков көчөсү 8г/1 дареги боюнча жайгашкан. Бул борборго №109, №143, №124 маршруттук каттамдар каттайт. Белгилей кетчү жагдай: ири калкты тейлөө борборунун ачылышы менен Ленин 318 жана Раззаков 2 даректеринде жайгашкан мурдагы эки калкты тейлөө борбору жабык. Эске салаарыбыз: үстүбүздөгү жылдын 13-сентябрынан тарта Ош шаарында оңдоп-түзөөдөн өткөн Бакыт үйү иштей баштады, анда ЗАГС аркылуу дагы каттоо кызматы бар.

Алишер ТОКСОНБАЕВ, өз кабарчы