1,590 Бардыгы /

          БАТКЕН. Баткен облусуна караштуу Кадамжай районунда кызын сабаган аял милициянын убактылуу кармоочу жайына киргизилди. Бул туурасында Баткен облустук иички иштер башкармалыгынын басма сөз кызматынан билдиришти.

          Маалыматка караганда, ушул жылдын 27-январында Кадамжай районунун 39 жаштагы А.Б. тургуну арыз менен кайрылып, анда жарандык никеде жашап жүргөн Ш.М. аттуу аялы эки жашар А.Х. аттуу кызын уруп, зордук-зомбулук көрсөтүп келгендигин билдирген. Ошентип, атайын тергөөнүн жүрүшүндө Ш.М. 5-январда өзүнүн кызын уруп, уюлдук телефонуна тартып жолдошуна WhatsApp аркылуу жибергендиги аныкталган. Аталган факты боюнча жаш балага карата соттук-медициналык жана аялга карата соттук-психолого-психиатриялык экспертизалар дагы дайындалган. Мындан тышкары жогорудагы факты боюнча Кылмыш-Жаза Кодексинин 138-беренесинин 2-бөлүмүнүн 2-пункту («Баланы же алсыз абалдагы, же күнөөлүүдөн материалдык же башкадан көз каранды болгон адамды уруп сабоо») боюнча кылмыш иши козголгон.

          Ошентип, кичинекей кызына карата зодук-зомбулук көрсөткөн Ш.М. үстүбүздөгү жылдын 30-январында Кадамжай райондук милициясынын убактылуу кармоочу жайына 48 саатка киргизилди. Ал эми Кадамжай райондук мамлекеттик акимчилигинин алдындагы балдар иштери боюнча комиссиясынын чечиминин негизинде, Ш.М.К. аттуу жарандын үч баласы мамлекеттин камкордугуна убактылуу алынып, Кадамжай районунда жайгашкан «Кут Кадам”» үй-бүлө тибиндеги балдар үйүнө жайгаштырылды.

Алишер ТОКСОНБАЕВ, өз кабарчы