1,089 Бардыгы /

Талды-Коргон шаардык соту өткөн жылы январда болгон кандуу окуялар маалында кармалган жарандарды кыйноого алган деп айыпталган беш полиция кызматкерин үч жылдан төрт жылга чейинки мөөнөттөргө эркинен ажыратты. Бул тууралуу “Азаттык” радиосунун казак кызматы кабарлады.

Маалыматка караганда, Айдын Кенжебаев менен Жанбакыт Нуртаз төрт жылга соттолсо, Сапарамурат Токташ 3,5 жылга эркинен ажыратылды. Дагы эки айыпталуучу – Ермек Жумашев менен Алмас Боканов үч жылга кесилди.

Мындан тышкары соттолгон полиция кызматкерлери буга чейин алган бардык наамдарынан ажыратылып, үч жыл коопсуздук органдарында иштөөсүнө тыюу салынды.

2022-жылы июлда Казакстандын Башкы прокуратурасы беш полиция кызматкери Январь окуялары маалында жарандарды ысык үтүк менен кыйноого алган деп шектелип жатканын билдирген. Анда алардын үчөө дароо күнөөлөрүн мойундарына алганы кабарланган. Бул иш боюнча 25 киши жабырлануучу деп табылган.

“Үтүк иши” боюнча соттук отурумдар өткөн жылы сентябрда башталган. Алгач айыпталуучулар үчүн катаал жаза талап кылган жабырлануучулар кийин соттон полиция кызматкерлерин шарттуу кесүүнү өтүнүшкөн. Алар мындай өтүнүчүн “президент Январь окуяларынын катышуучуларын кечирип, талаптарын аткарып, жардам бергени” менен түшүндүрүп, жабырлануучулар да укук коргоо кызматкерлерин кечиргенин айтышкан. Аларды мындай билдирүү жасоого бийлик кысым көрсөткөн-көрсөтпөгөнү белгисиз.

Соттун басма сөз кызматы билдиргендей, өкүм чыгарууда судья айыпталуучулардын “күнөөнү толук мойнуна алганын, келтирилген чыгымдын ордун толтурганын жана эрезеге жете элек балдарынын бар экенин” эске алган. Сот жазаны жеңилдетүүчү жагдай катары полиция кызматкерлери кылмышты өзгөчө кырдаал маалында жасаганын жана алардын ант бергенин атаган.

Өткөн айда Алматы соту Январь окуяларындагы кыйноо иштери боюнча эки укук коргоо кызматкерин үч жылга кесип, дагы бирөөнүн эркиндигин чектеген өкүм чыгарган.

Казакстанда суюлтулган газдын кескин кымбатташына байланыштуу тынчтык митингдери былтыр 2-январда башталып, кийин өлкөнүн башка аймактарына жайылган. Башаламандыкта бийлик элге каршы от аткан. Расмий маалыматка караганда, кандуу тополоңдо кеминде 238 киши каза болгон. Алардын көбүнө ок тийген.

WWW.