384 Бардыгы /

ОШ. Ош шаардык ички иштер башкармалыгынын кызматкерлери Бишкектин 20 жана 19 жаштагы шектүү эки тургунун  кармады. Алар синтетикалык маңзаттарды борбор калаадан – Бишкек шаарынан аймактарга такай таратып тургандыгы акырында аныкталды. Ошондой эле булардан салмагы 3 кило 524 грамм синтетикалык наркотикалык каражаттар дагы алынды.

Милициянын маалыматына караганда, үстүбүздөгү жылдын 9-январында Ош шаарында 20 грамм синтетикалык маңзаттар бекитилген күрмөнү  алып бара жаткан курьер кармалган. Ошентип, бул факты лабораторияны, ири суммадагы маңзаттарды табууга жана ири каналды жабууга дагы шарт жаратты. Кармалган жарандар алгачкы тергөө кызматынын маалыматтарына караганда, Бишкек шаарынан атайын батир жалдашып, а түгүл ал жерди заманбап лабораторияга дагы кылышып, Кыргызстан боюнча синтетикалык маңзаттарды таратуучу борборго айландырууну  тыкыр максат кылышкан экен.

Ошентип, кармалган жарандардын батиринде синтетикалык маңзаттарды жасоочу лаборатория дагы аныкталып, анда синтетикалык заттарды жасоочу шаймандар, зергер тараза, синтетикалык наркотикттер жасалуучу чийки заттар, трафереттер, атайын идиш-аяктары жана аймактарга жөнөтүүгө даярдалып коюлган ар кандай түстөгү 3 кило 324 грамм синтетикалык маңзаттар кошо табылды. Алынган маңзаттар ар кандай түстө экен. Ошондой эле жалпы салмагы 3 кило 524 грамм синтетикалык маңзаттар дагы  алынды.

Ошентип, кармалган эки жаран Бигшкек шаарынан Ош шаардык ички иштер башкармалыгына алынып келинип, убактылуу кармоочу жайга киргизилди. Милиция бул кылмыштын бетин ачууга төрт ай убакыт короткондугун  кошумчалады.

Алишер ТОКСОНБАЕВ, өз кабарчы