825 Бардыгы /

ОШ. Ош шаардык «Жылуулук камсыздоо» ишканасына жарандар 37 миллион сом карыз. Бул жөнүндө аталган ишкананын жетекчиси Бекмурза Эргешов ачыктады.

– Үстүбүздөгү жылдын 1-апрелине карата жалпы кардарлардын биздин ишканабызга карызы 37 миллион сомду чапчыды. Ал эми кээ бир шаар тургундары үйлөрүн ижарага берип коюшуп, ошондон дагы жылуулукка убагында акы төлөнбөгөн учурлар көп кездешет. Сентябрь айына карата карыздын көлөмү азаят деп турабыз. Мисалы, былтыр жылуулук сезонду утурлай карыз 25 миллион сомду түзгөн. Андан мурунку жылы 30 миллион сомдун тегерегинде болгон эле, – деп кошумчалады Ош шаардык «Жылуулук камсыздоо» ишканасынын директору Бекмурза Эргешов.

Бекмурза Эргешов бул карыздардын негизги суммасы көп кабаттуу үйлөргө тиешелүү экендигин дагы кошумчалап, алдыдагы жылуулук сезону башталганга чейин карыздын суммасы азая тургандыгын айтты. Ал мындан тышкары алдыдагы кышкы жылытуу сезонуна карата даярдыктар эмитен башталгандыгын кошо шардана кылды. Белгилей кетчү жагдай: Ош шаарындагы «Жылуулук камсыздоо» ишканасы Кыргызстандын Түштүк башкалаасындагы 14 417 кардарды тейлеп келатат.

Алишер ТОКСОНБАЕВ, өз кабарчы