1,242 Бардыгы /

Түркмөнстандын Мары облусунда жергиликтүү бийлик мамлекеттик мекемелер менен ишканаларда иштеген жумушчулардын катышуусунда чогулуштарды өткөрүп, аларды “адептүү болууга жана жупунураак кийинүүгө” чакырууда. Бул тууралуу “Азаттык” радиосунун түркмөн кызматы кабарлады.

“Чогулуштарда аялдарга кайрадан жасалма кирпик жана тырмак чаптоого, чачтарын ачык түскө боёого, кыска жана денеге чапташкан кийимдерди кийүүгө, сөйкө жана шакек тагынууга болбой турганын айтып жатышат. Аткаминерлер бул эрежени бузган аялдар иштен алынарын эскертүүдө”, – деп билдирди радионун Мары облусундагы кабарчысы.

Анын айтымында, мындай чогулуштарда бийлик өкүлдөрү жасалма кирпик же тырмак чаптаган аялдарды сахнага чыгарып, аларды кемсинтүүдө.

“Андай аялдарга өздөрүнүн табигый сулуулугун бузуп жатканын эскертип, бузулган аялдарга окшоп калышарын айтып жатышат”, – деди аймактагы чогулуштардын бирине катышкан мугалимдердин бири.

Облустагы медициналык жайлардын биринин дарыгери белгилегендей, ошол эле маалда бул чектөөлөрдүн маданият тармагында иштеген кызматкерлерге, телеканалдардын алып баруучуларына тиешеси жок, анткени алар мамлекеттик пропаганданын бир бөлүгү болуп эсептелет.

Мындай чогулуштар менен катар айрым мамлекеттик мекемелерде текшерүүлөр да башталганы айтылууда. Алардын жүрүшүндө жогорудагы тыюуларды бузган аялдар аныкталып, түшүнүк кат жазууга мажбурланууда.

Түркмөнстанда аялдардын тышкы келбетине көзөмөл былтыр апрелде, бийликке мурдагы президент Гурбангулы Бердымухаммедовдун уулу Сердар Бердымухамедов келгенден кийин күчөгөн. Өлкөдө косметикалык операциялардын айрым түрлөрүнө, алсак, төштүн пластикасына же татуажга тыюу салынган. Көчөдө жасалма тырмак жана кирпик чаптап алгандарды кармоо учурлары көбөйгөн. Аборт жасатууга дээрлик тыюу салынып, бул эрежелерди сактабаган аялдар кармалып, айып пул салынып, атүгүл жумуштан бошотулгандары да болгон.

Түркмөнстанда аялдар басмырланып жатканы тууралуу “Азаттыктын” түркмөн кызматы баштаган бир катар эл аралык ЖМКлардын көптөгөн макалаларынан кийин бул чектөөлөр жумшартылып, айрым косметикалык кызматтарга кайра уруксат берилген.

WWW.