774 Бардыгы /

БАТКЕН. Баткен облусуна караштуу Кадамжай районунда чек арадан мыйзамсыз өтүшкөн жана мыйзамсыз миграция дагы уюштурушкан чет өлкөнүн эки жараны кармалышты. Бул туурасында Баткен облустук милициясынан билдиришти.

Маалыматка караганда, Кадамжайда Өзбекстандын 36 жаштагы И.Г. аттуу жараны мамлекеттик чек арадан мыйзамсыз өтүп, нан жабуучу жайда (наавайканада) эмгектенип жаткандыгы аныкталып, Кыргыз Республикасынын Кылмыш-Жаза Кодексинин «Мамлекеттик чек арадан мыйзамсыз өтүү» беренеси менен сотко чейинки өндүрүш иши ачылды.

Ошентип, тергөө иштеринин алкагында аталган жаранды Кыргызстандын аймагына мыйзамсыз алып келип, мыйзамсыз иштетип жаткан Өзбекстандын башка жараны 39 жаштагы У.О. экендиги дагы аныкталып, Кадамжай РИИБсынын КБРне КР Кылмыш-Жаза Кодексинин «Мыйзамсыз миграцияны, мигранттарды мыйзамсыз алып келүүнү (алып чыгууну) уюштуруу» беренеси менен кылмыш иши козголуп, сотко чейинки өндүрүш иши ачылды. Ушул тапта кармалган эки жаран тең убактылуу кармоо жайына киргизилип, тергөө иштери абдан кызыды.

Алишер ТОКСОНБАЕВ, өз кабарчы