447 Бардыгы /

          БАТКЕН. Баткен облусунун Кадамжай районунда жайланышкан «Дугаба» альпинисттик-туристтик базасы расмий түрдө ачылып, акыры өз ишмердүүлүгүн жүргүзө баштады. Аталган базаны заманбап жаңылоого Дүйнөлүк банк жана Глобалдык Экологиялык фонд дээрлик 34 миллион сом өлчөмүндө каржылык жардам көрсөтүштү.

Ошентип, Дугабада жергиликтүү коноктор жана туристтер үчүн эс алууга өтө ыңгайлуу шарттар гана түзүлдү. Мында жалпы жонунан 84 орун бар. Эс алуу базасынын жалпы аянты 40 гектарды түзөт. Бул туристтик базанын ачылышына президенттин Баткен облусундагы ыйгарым укуктуу өкүлү Абдыкарим Алимбаев, республикабыздын айыл чарба министри Аскарбек Жаныбеков жана дагы Өзбекстандын Фергана облусунун башчысынын орун басары Хуршед Ахмедов жетектеген делегация катышты.

Белгилей кетчү жагдай: «Дугаба» эс алуу комплекси 1997-жылы негизделген. Ал Баткен облусундагы Кадамжай шаарынан 31 чакырым алыста жайланышкан. Дугаба туристтик базасына коңшу Өзбекстандын Шахимардан анклавы аркылуу өтөт. Ал эми «Дугаба» капчыгайы – альпинизмди өнүктүрүүгө ыңгайлуу чокулары, уникалдуу пейзажы жана туристтер үчүн жагымдуу шарттары менен абдан өзгөчөлөнөт.

Алишер ТОКСОНБАЕВ, өз кабарчы