693 Бардыгы /

ОШ. Деги эмне болуп баратабыз? Ошто атасын өлтүргөн деп шектелген 41 жаштагы жергиликтүү тургун кармалды. Бул туурасында Ош шаардык милициясынан билдиришти.

Ош шаардык ички иштер башкармалыгынын басма сөз кызматынын маалыматына караганда, окуя үстүбүздөгү жылдын 14-августунда Амир-Темир кичи районунда жүз берген. 68 жаштагы тургунду өзүнүн эле уулу өз үйүндө бычак менен көкүрөгүнө жана колдоруна катарынан сайгылап таштаган. Бычакталган жаран ошол жерде эле дароо жан берген.

Милиция ата-бала чырдаша кеткендигин, шектүү адам документтерин алып, таксиге отуруп, окуя болгон жерден качууга аракеттенип жаткан маалда гана кармалгандыгын билдирди. Ош шаардык ички иштер башкармалыгынын Ак-Буура милиция бөлүмү Кылмыш-Жаза Кодексинин «Адам өлтүрүү» беренесинин негизинде шектүүнүн үстүнө кылмыш ишин козгоп, 41 жаштагы киши дароо убактылуу кармоочу жайга киргизилди.

Ал эми маркум өзү төрт баланын атасы экендиги, аны өлтүрүүгө шек саналып жаткан уулунун эки баласы бардыгы, ошондой эле ал эч жерде таптакыр иштебегендиги дагы кабарланды.

Алишер ТОКСОНБАЕВ, өз кабарчы