1,059 Бардыгы /

ОШ. 2010-жылдагы июнь коогалаңында күч жана аскер кызматкерлерин өзгөчө мыкаачылык менен өлтүргөн деген шек менен Ош облусунун Кара-Суу районунун 50 жаштагы тургуну кармалды. Бул туурасында Улуттук коопсуздук боюнча мамлекеттик комитетинин (УКМК) басма сөз кызматынан билдиришти.

Маалыматка караганда, издөөдө жүргөн шектүү чет өлкөлөрдүн биринен кармалды. Ал 2010-жылдын июнь айында Ош облусундагы жапырт башаламандыкка катышкан, Кара-Суунун Нариман айылында укук тартибин коргоочуларды жана Коргоо министрлигинин аскер кызматкерлерин өзгөчө мыкаачылык менен өлтүрүүгө тиешеси болгон деп шектелип жатат. Тергөөсү уланган кылмыш ишинин алкагында ал Ош шаарындагы тергөө абагында кармалаары кабарланды. УКМК 2010-жылдын Июнь окуясынын уюштуруучуларын жана көптөгөн адамдардын өлүмүнө алып келген активдүү катышуучуларын аныктоо, аларды жоопко тартуу боюнча комплекстүү ыкчам-издөө иш-чараларын жүргүзүп жатканын белгилеп, бул окуяда «Өзгөчө оор кылмыш жасаган адамдарга карата эскирүү мөөнөтү колдонулбайт!» деп катуу эскертти.

Баса, мындан 13 жыл мурун жүз берген Июнь окуясында 446 адам каза таап, 2 миңге чукулу ар кандай деңгээлде жараланган. Дагы 57 адам дайынсыз жоголгон, булардын 15тен ашыгы ушул күнгө чейин табыла элек. Башкы прокуратуранын 2020-жылдагы маалыматына ылайык, жалпы 5642 кылмыш иши козголгон. Бирок, алардын көбүнүн бети ачылбай калган. Жүздөн ашуун адамга издөө жарыяланган. Мындан сырткары этникалык кагылышты уюштурду деген шек менен Интерпол аркылуу 37 адам эл аралык издөөгө берилген.

Алишер ТОКСОНБАЕВ, өз кабарчы