666 Бардыгы /

          ОШ. Кыргызстандын Түштүк башкалаасынын мэри Бакытбек Жетигеновдун тапшырмасына ылайык, мерчемделген иш-аракеттердин алкагында Жолдошбек Раимбеков (мурунку Зайнабетдинов) көчөсүнүн Апсамат Масалиев проспектисинен баштап, Кара-Суу көчөсүнө чейинки бөлүк толук бойдон оңдоп-түзөөдөн өткөрүлө баштады.

          Долбоорго ылайык аталган көчөнү көрктөндүрүү, жолго асфальт төшөө жана жарыктандыруу жумуштары дагы каралган. Жолдун жалпы узундугу 530 метрди, туурасы 22 метрди түзөт. Анын эки тарабындагы туурасы 5 метрден 8 метрге чейинки тротуарлар дагы оңдоп-түзөлөт. Буга улай ушул жерде шаар тургундары жана жашоочулары үчүн дагы заманбап эс алуу аянтчалары курулуп, жарыктандырылып, андан ары жашылдандырылмакчы. Ошондой эле видеобайкоо системаларды, инсталляцияларды, фотозоналарды, көчөгө кооздолгон чатырлары бар отургучтарды орнотуу, калк үчүн эс алуучу жайларды куруу, ар кандай жарнамалык, майрамдык, анимациялык LED экрандарды коюу, велосипед токтотуучу жайларды уюштуруу дагы каралган.

          Баса, ушул тапта Жолдошбай Раимбеков көчөсүндө жайгашкан жеке менчик коомдук тамактануучу жайлардын убактылуу жана мыйзамсыз тосмолору катарынан алынып салынууда.

Алишер ТОКСОНБАЕВ, өз кабарчы