888 Бардыгы /

        ОШ. Ош облусунун Өзгөн районуна караштуу Мыйза-Аке айыл өкмөтүндө эки мектепке чейинки билим берүү мекемеси ачылды. Бул туурасында Президенттин Ош облусундагы өкүлчүлүгүнөн билдиришти.

       Маалыматка караганда, бала бакчалардын ачылуу аземине президенттин өкүлүнүн орун басары Эрнис Толтоев, Ош облустук билим берүү институтунун директору Гулмира Турдубаева, Өзгөн районунун акими Каныбек Апбасов, жергиликтүү тургандар, айыл аксакалдары, жаш жеткинчектер жана алардын ата-энелери катышышты. Адеп чогулгандар 80 орундуу «Эркинбү апа» мектепке чейинки билим берүү мекемесин, андан соң 100 орундуу «Ханбаян-Нур» балдар бакчасын ачышты. Аталган балдар бакчаларын ачууга Таабалды Жусубалиев жана анын үй-бүлөсү, Гүлкан Жороева жана анын үй-бүлөсү демөөрчүлүк кылып, Мырза-Аке айыл өкмөтү демилгелерди кубаттаган. Ошондуктан, алар билим берүүгө кошкон салымы үчүн атайын сыйлыктар менен сыйланышты. Президенттин Ош облусундагыөкүлүнүн орун басары Эрнис Толтоев бала бакчалардын ишке кириши менен жергиликтүү тургундарды кызуу куттуктап, жыл ичинде Ош облусунун аймагында 50 бала бакча ачыла тургандыгын шардана кылды.  

      Маалымат ИРЕТИНДЕ: 80 орундуу «Эркинбү апа» мектепке чейинки билим берүү мекемесин ардактуу ардагер, демөөрчү Таабалды Жусубалиевдин өздүк каражатынан 2 Миллион сомдон ашуун каражатын жумшап, өзүнүн турак жайын оңдоп-түзөп, тиешелүү эмеректер менен жабдып, бала бакчаны жамааттык пайдаланууга даярдаган. Ал эми 100 орундуу «Ханбаян-Нур» балдар бакчасы Гулкан Жороева жана анын үй бүлөсү тарабынан 15 миллион сом акча каражаты спраталып, 2 кабаттуу имарат толук кандуу бүткөрүлүп, эмеректер менен жабдылып, жамааттык бала бакча катары пайдаланууга даярдалган.

          Алишер ТОКСОНБАЕВ, өз кабарчы