678 Бардыгы /

          ОШ. Кыргызстандын Түштүк башкалаасындагы жеке тараптарга энчиленип кеткен социалдык обьектилердин жерлерин мамлекетке кайтарып алуу иштери эми гана башталат. Муну Ош шаарынын мэри Бакытбек Жетигенов өзү катуу убадалады.

          Адегенде Кыргызстандын Түштүк башкалаасынын жетекчисиБакытбек Жетигенов шаардагы бир катар соцобьектилерди жеринде гана кыдырды. Мунун арасынан №8-Максим Горький жана №24 Михаил Фрунзе атындагы мектептерине дагы баш бакты. Аталган билим берүү мекемелеринин аймагына курулуп калган, жеке жактарга таандык курулуштарды мыйзам алкагында карап чыгып, мектептин аймагына жер тилкесин кайтарып берүү боюнча тиешелүү кызматтардын жана бөлүмдөрдүн жетекчилерине жеринде тиешелүү тапшырмаларды дагы берди. Маселен, Максим Горький атындагы мектептин аймагынын эки тарабы коммерциялык имараттарга, ал эми Михаил Фрунзе атындагы мектептин аймагынан 16 соода жайына энчиленген. Ош шаарынын мэриясынын алдындагы атайын түзүлгөн комиссиянын маалыматына караганда, 56 орто мектептин ичинен 31 мектептин аймагында мурда жеке жактарга бөлүнүп берилген жер тилкелери бар экендиги эми гана аныкталып олтурат. Бул аянттарга турак жай, ар кандай имараттар, тосмолор, ошондой эле соода түйүндөрү дагы орнотулган.

          Ошентип, саналган обьектилер боюнча Ош шаарынын мэри Бакытбек Жетигенов социалдык обьектилердин аймагын муниципалдык менчикке кайтаруу үчүн бардык документтерди көтөрүү жана мыйзам чегинде тиешелүү иш аракеттерди алып баруу боюнча протоколдук тапшырмаларды кошо берди. Калаа башчысы ошондой эле жакынкы күндөрү шаардагы баардык социалдык обьектилерди өзү баштап жеринен көрүп чыкмакчы. Мында жеке тараптарга берилип кеткен жер аянттарын кайтарып алууга дагы басым жасалат.

Алишер ТОКСОНБАЕВ, өз кабарчы