1,503 Бардыгы /

ОШ. Баса, кызматтык батирлерди бөлүштүрүүдө документ жасалмалашкандыгы үчүн Ош облустук Ички иштер башкы башкармалыгынын кызматкерлери кармалышкандыгын УКМКдан билдиришти. Аталган кылмыш иши мындан эки жыл мурун козголгон экен. Бирок, кызматкерлердин аракетинде кылмыштын курамы жок болгондуктан кыскартылыптыр.

          220 батирлүү турак жай Ош шаарында 2021-жылы милиция кызматкерлери үчүн курулуп, ачкычтары ээлерине тапшырылган. Бирок, укук коргоо органдарына батирлер мыйзамсыз бөлүштүрүлгөндүгү боюнча көп даттануу түшкөндүктөн, кайрадан кылмыш иши козголуп, кийин Ош облустук ички иштер башкармалыгынын кызмат адамдарынын аракеттеринде кылмыштын курамы жок болгондуктан дагы кыскартылган.

          Бирок, Башкы прокуратура тарабынан кылмыш иши кайрадан жандандырылып, УКМКнын Жалал-Абад облусу боюнча башкы башкармалыгына өткөрүлгөн. Тергөөнүн жүрүшүндө 2021-жылы Ош облустук Ички иштер башкы башкармалыгынын транспорт боюнча ички иштер бөлүмүнүн жетекчиси М.Ы.А. жана анын орун басары Ж.М.Р. кызмат абалынан кыянатчылык менен пайдаланышып, биринчи кезектеги кызматкерлерди башка аймактарга атайылап которушкандыгы аныкталды. Андан кийин Турак жай жана турмуш-тиричилик комиссиясынын мүчөлөрү менен алдын ала жең ичинен сүйлөшүп, документтерди бурмалашып кезекте турбаган адамдарды деле алдыңкы катарга киргизип ташташкан.

          Ошентип, тергөө тарабынан чогултулган далилдердин негизинде 2023-жылдын 25-сентябрында транспорт боюнча ички иштер бөлүмүнүн жетекчиси М.Ы.А., анын орун басары Ж.М.Р. жана Д.А.К. аттуу кызматкер кармалышып, УКМКнын Жалал-Абад облусу боюнча башкы башкармалыгынын убактылуу кармоочу жайына киргизилген. Ушул тапта тергөө жараяны кызуу улантылууда.

Алишер ТОКСОНБАЕВ, өз кабарчы