684 Бардыгы /

БАТКЕН. Жол кырсыктарын алдын алуу максатында Ош – Баткен – Раззаков автоунаа жолуна соккуга каршы буферлер орнотулуп жатат. Бул туурасында Транспорт жана коммуникациялар министрлигинин басма сөз кызматынан билдиршти.

Маалыматка караганда, ушул тапта иштер аталган жолдун 83-, 124- жана 126-чакырымында (Кызыл-Кыя жана Кадамжай шаарлары) жүрүп, атайын буферлер кооптуу бурулуштарга гана коюлуп жатат. Кум толтурулган челектин бийиктиги 80 см, диаметри 55 сантиметрди түзүп, салмагы 200 килону чапчыйт. Жолдун ортосундагы тосмолордун баш-аягына коюлуп жаткан атайын челектер ачык түскө ээ болуп, түн ичинде дагы алыстан дапдаана көрүнөт.

Кыскасы, кырсык баскан маалда буферлер соккуга жана деформацияга туруштук бере алат. Бул унааларга келтирилген зыянды дагы ого бетер азайтып, жүргүнчүлөрдүн коопсуздугун толук кандуу камсыз кылат. Буга дейре Чүй облусунун жолдоруна дагы орнотулган соккуга каршы буферлер алдыда жети дубандын жолдоруна кыдырата коюлмакчы.

Алишер ТОКСОНБАЕВ, өз кабарчы